बर्दियाको मधुवन नगरपालिका वडा नं –२ मा बस्ती नजिक आएको वयस्क उमेरको चितुवा नियन्त्रणमा लिईएको छ ।
मधुवन–२ चमेली गौरी सामुदायिक वनका स्थानीयहरुले विहान करिब ७ बजेको समयमा झाडी सर सफाई गर्ने क्रममा चितुवा देखापरेपछि तुरुन्तै सम्वन्धीत निकायमा खबर गरेको उक्त सामुदायिक वनका अध्यक्ष राम लाल चौधरीले बताए ।
चितुवा भगाउन बर्दिया राष्ट्रिय निकुञ्जबाट ५ वटा हात्ती परिचालन गरिएता पनि चितुवा नभागेपछि जिल्ला प्रमुख अधिकारीको उपस्थितिमा, डिभिजन वन कार्यालय वर्दिया, बर्दिया राष्ट्रिय निकुञ्ज, राष्ट्रिय प्रकृति संरक्षण कोष बर्दिया, नेपाली सेना जबर जंग गण ठाकुरद्वारा, नेपाल प्रहरी, सशस्त्र प्रहरी बल, चोरी सिकार नियन्त्रण एकाई र स्थानीय उपभोक्ताहरुको सहयोगमा राष्ट्रिय प्रकृति संरक्षण कोष बर्दियाको डार्ट टिमले डार्ट गरी नियन्त्रणमा लिइएको हो ।
वयस्क चितुवाको लम्बाई शिरदेखि पुच्छरसम्म २ सय १७ सेन्टिमिटर, पुच्छर ९४ सेन्टिमिटर थियो भने उचाई ६२ सेन्टिमिटर रहेको थियो ।
