आजभोलि तराई क्षेत्रमा विभिन्न प्रकारका स्वास्थ्य समस्याहरु देखा पर्न थालेका छन् ।बर्षाको मौसम छ।हल्का बर्षा र गर्मीको समय चलिरहेको छ । जेष्ठ नागरिक, सुत्केरी महिला तथा बालबालिकाहरुमा मौसम जन्य भाइरल ज्वरो, टाइफाइड जस्ता रोगहरुको कारण अस्पतालमा विरामीको भिड बढ्न थालेको छ । वर्षाका कारण खाल्डा तथा तलाउमा पानी जम्ने र झारपात बढेर फोहर हुने हुँदा लामखुट्टेको टोकाइबाट औलो, डेङ्गु, इन्सेफ्लाइटिस जस्ता रोगहरुको जोखिम यो मौसममा देखिन्छ ।साथमा सर्पको टोकाइको जोखिम पनि यो समयमा बढी नै हुन्छ । बर्दिया जिल्लाका सबैजसो स्वास्थ्य संस्था र विशेष गरी बर्दिया जिल्ला अस्पतालमा अहिले बिरामीहरु उल्लेख्य रूपमा बढ्न थालेका छन् । बर्दिया जिल्ला बाहिर भेरी अस्पताल नेपाल गन्ज र मित्र राष्ट्र भारतमा गएर उपचार गराउने बिरामीहरुको सङ्ख्या समेत उल्लेख्य छ । जिल्लामा उपचारका लागि बिरामीको चाप धान्ने स्वास्थ्य संस्थाको अभाव छ । अहिलको जनसंख्या र बिरामीको चाप हेर्ने हो भने हाम्रो बर्दिया जिल्ला अस्पतालले धान्न सक्ने अवस्था छैन । बर्दिया जिल्ला अस्पताललाई अब १०० भन्दा बढी शैयाको गुणस्तरीय अस्पतालका रूपमा रुपान्तरण गर्नु आवश्यक भएको छ । यसका साथै स्वास्थ्य क्षेत्रमा दक्ष जनशक्तिको उपलब्धता र टिकाउपन अर्को चुनौतीका रूपमा रहेको छ ।
एकातिर नागरिकका लागि उपचारको प्रबन्ध मिलाउन स्तरीय स्वास्थ्य संस्थाको व्यवस्थापन आवश्यक छ भने अर्कोतिर नागरिकहरुलाई रोग लाग्न बाट बचाउन सचेत बनाउन समेत आवश्यक छ । यो मौसममाअधिकाङ्श नागरिकहरु विभिन्न प्रकारका रोगबाट प्रभावित हुने सम्भावना रहन्छ । रोग लागेर उपचार गर्नु भम्दा रोग लाग्नबाट बच्नु बुद्धिमानी हो । त्यसका लागि रोग प्रतिरोधात्मक अभियान संचालन र स्वास्थ्य सचेतता अभिवृद्धि गर्न आवश्यक छ ।
