जिल्ला प्रशासन कार्यालय बर्दियाको आयोजनामा मंगलबार सूचनाको हक कार्यान्वयन सुनिश्चितता विषयक अन्तरक्रिया कार्यक्रम सम्पन्न भएको छ ।
कार्यक्रममा जिल्लाका सबै स्थानीय पालिकाका सूचना अधिकारी, विभिन्न सरकारी कार्यालयका सूचना अधिकारी, सामाजिक अभियान्ता तथा सञ्चारकर्मीहरुको उपस्थितिमा आम नागरिकलाई सूचना दिने व्यवस्थाबारे आ–आफ्नो अनुभव आदानप्रदान कार्यक्रम गुलरियामा सम्पन्न भएको छ ।
कार्यक्रमलाई सम्बोधन गर्दै प्रमुख जिल्ला अधिकारी सुरेन्द्र पौडेलले सार्वजनिक पदमा रहेका राष्ट्रसेवक कर्मचारीको प्रमुख दायित्व नागरिकलाई सहि, सत्य, तथ्यपूर्ण र छिटो सूचना उपलब्ध गराउनु रहेको बताए । उनले धेरै सरकारी कार्यालयमा वेभसाइट मार्फत सूचना दिने व्यवस्था मिलाइएको भए पनि केही कार्यालयमा अझै सुचना दिने सवालमा सुधार आवश्यक रहेको उनले भने ।
सञ्चारकर्मीहरुले उठाएका प्रश्नको जवाफ दिंदै प्रमुख जिल्ला अधिकारी पौडेलले भने “यदि केही कार्यालय प्रमुखले सूचना नदिएको पाइएमा तत्काल सोधपुछ गरिनेछ” “सूचनाको हक सुनिश्चित गर्न कडाइका साथ कदम चालिने” उनले बताए । पूर्वाधार विकास तथा निर्माण सँग सम्बन्धित योजनामा सूचना पाटी टाँस गर्ने व्यवस्था अनिवार्य गरिने कार्यान्यवन गराउने समेत प्रमुख जिल्ला अधिकारी पौडेलले जानकारी दिए ।
