एकवर्ष भित्र दिवंगत भएका परिवारको सदस्यहरुको सम्झनामा बर्दियाको गुलरियामा गाईजात्रा प्रदर्शन गरिएको छ । नेवा देय दवु गुलरिया नगर कमिटिको आयोजना मा गुलरियामा नेवार समुदायमा यस वर्षमा दिवंगत भएका परिवारका सदस्यको सम्झनामा गाइजात्रा निकालिएको हो ।
एकवर्षको समयमा दिवंगत भएका सदस्य स्व.गोपालमान श्रेष्ठ को परिवारहरुले आफ्ना दिवंगतको सम्झनामा एकै स्थानमा भेला भई गाईजात्रा निकालेका हुन् ।
गाईजात्राको टोलिले गुलरियाको गणेशमान चोक देखि भन्सार रोड, बंगलामुखी मंदिर, हुलाक चोक हुदै गुलरिया बजार परिक्रममा गरेका थियो । गाईजात्राको अवसरमा नेवारी पोशाकमा सजिएका महिला तथा पुरुषहरूले नेवारी भाषाका गीतमा नृत्य प्रस्तुत गर्नुका साथै लाखे नाच पनि देखाएका थिए ।
नेवारी समुदायमा एक वर्षभित्र दिवंगत भएका आफन्तको सम्झनामा गाईजात्राका दिन गाई वा मानिसलाई गाईका रूपमा सिँगारी आ–आफ्ना क्षेत्रमा परिक्रमा गराउने तथा उनीहरू लाई श्रद्धालुद्वारा दूध, फलफूल, रोटी, चिउरा, दहीका साथै अन्न र पैसा दान गरिन्छ ।
राजा प्रताप मल्लले पुत्रशोकले विह्वल भएकी आफ्नी रानीलाई संसारले यस्तो शोक व्यहोर्नुपर्छ भन्ने देखाउन ‘आ–आफ्नो घरका दिवंगत भएका व्यक्तिका नाममा गाईजात्रा निकाली शहर परिक्रमा गराउनू” भनी निर्देशन दिएका आधारमा यो पर्व शुरु भएको मान्यता छ ।
