बर्दिया जिल्लाको सदरमुकाम गुलरिया, मधुबन, बारबर्दिया, ठाकुरबाबा नगरपालिका लगायतका धेरै भूभाग बबई नदीको जोखिमबाट प्रभावित हुने गर्दछ । बबई नदीमा सुरु गरिएको तटबन्ध बजेट अभावमा अधुरो रहेको छ त्यसैले यस पटकको बस्र्मा बर्दियामा बबई नदीबाट बाढी र कटानको जोखिम बढी रहेको छ ।
मनसुनको सक्रियतासगै निरन्तर बर्षा हुने क्रम बढिरहेको छ । बढ्दो बर्षाले नदीको वहाव दिनप्रतिदिन बढ्दै छ । बर्दिय जिल्लाको सदरमुकाम गुलरियामा नदीको बहाव बढेसगै बाढीको जोखिम हुने आकलन गर्न थालिएको छ । विशेष गरेर गुलरिया क्षेत्रमा बबई नदीमा तटबन्धन पूरा नभएका ठाँउहरुमा नदीले कटान गर्न सक्ने र ती ठाउँ भएर बबई नदी गुलरिया बजार क्षेत्र लगायत आसपासका गाउँहरुमा पस्न सक्ने जोखिम रहेको स्थानीय बासिन्दाको आकलन रहेको छ । बबई, भादा, ओराही नदी नियन्त्रण आयोजनाले थालेको तटबन्धन कार्य बजेट अभावले पूरा हुन नसक्दा अहिले गुलरिया असुरक्षित बन्न पुगेको छ । बर्दिया जिल्लामा स्थापित बबई नदी व्यवस्थापन आयोजना जिल्लाबाट बाहिर लगिएको घटनाबाट यस क्षेत्रका नागरिक चिन्तित बनेका छन । आयोजनालाई पूर्ण संचालनमा ल्याउन बजेट अभाव हुन नदिन राज्यको गम्भीर ध्यानाकर्षण गराउन जोड दिन आवश्यक छ ।
नदी बस्तीमा प्रवेश गर्न सक्ने र कटान गरेर क्षेति पुर्याउन सक्ने पहिचान भएका ठाउँमा कसरी सम्भाव्य जोखिमबाट बच्न पूर्व कार्य गर्ने भन्ने विषयमा गम्भीर गृहकार्य हुन सकेको छैन । अस्थायी रुपमा भए जोखिम न्यूनीकरणका लागि आवश्यक पर्ने बजेट समेत आयोजना सग छैन भन्ने सूचनाले जोखिममा के गर्ने भन्ने विषय थप पेचिलो बन्न पुगेको छ।जिल्ला र पालिका स्तरमा रहेका विपतसग सम्बद्ध सरोकारवाला कार्यालय ,संस्था तथा यस क्षेत्रका जनप्रतिनिधिहरुले सामुहिक रुपमा यस विषयमा छलफल चलाउनु र आवश्यक योजना निर्माण गर्न तदारुकता देखाउन आवश्यक छ।बाढीको जोखिम बर्दियाको गम्भीर र टड्कारो समस्या हो यसको ध्यानाकर्षण समाधानका लागि राज्यले लिनु पर्छ ।यसका लागि सबै पक्षबाट राज्यको ध्यानाकर्षण गराउन आवश्यक छ ।
