बर्दिया जिल्लामा गत आर्थिक बर्ष २०८१/०८२ मा सवारी साधन दुर्घटनामा ३८ जनाको मृत्यु भएको जिल्ला ट्राफिक प्रहरी कार्यालय बर्दियाले जानकारी दिएको छ ।
गत आर्थिक बर्षमा ४ सय ८२ सवारी साधन दुर्घटना भएकोमा ३८ जनाको मृत्यु भएको र ७ सय ५८ जना घाइते भएको जिल्ला ट्राफिक प्रहरी कार्यालय बर्दियाका प्रमुख प्रहरी निरीक्षक सुधिर कुमार खड्काले बताए ।
दुर्घटना बढि हुनुमा सवारीसाधन तिव्रगति चलाउनु, सवारीसाधनहरुले ट्राफिक नियम को उल्लङ्घन गर्नु र ग्रामिण भेगमा मादकपदार्थ सेवन गरेर सवारीसाधन चलाउदा दुर्घटना बढि हुने गरेको पछिल्लो घटना क्रमले देखाएको समेत प्रहरी निरिक्षक खड्काले जानकारी दिए ।
दुर्घटना न्यूनिकरणका लागि बर्दिया ट्राफिक प्रहरी कार्यालयले जिल्लाका हरेक विद्यालयका विद्यार्थीहरु माझ ट्राफिक सम्बन्धित जनचेतनामुलक कार्यक्रमहरु गर्ने, सम्भावित दुर्घटना हुने स्थान राजमार्ग छेउका स्थानीहरुलाई एकिकृत गरि राजमार्गमा दुर्घटना न्यूनिकरणका लागि हरेक गाँउ हरुमा ट्राफिक सचेतनामुलक कार्यक्रमहरु गरिएको र सवारीसाधनका चालक र सहचालकहरुलाई निरन्तर ट्राफिक नियम सम्बन्धित जनचेतना कार्यक्रमहरु संचालन गरिरहेको समेत बर्दिया ट्राफिक प्रहरी प्रमुख प्रहरी निरिक्षक खड्काले भने ।
प्रहरी निरिक्षक खड्काका अनुसार गत आर्थिक बर्षमा १२ हजार ३ सय २५ सवारीसाधनलाई कारवाही गरिएको र सवारीसाधन कारवाही गरे वापत ९३ लाख ६७ हजार ५ सय १ रुपैया राजस्व संकलन भएको समेत उनले बताए । पछिल्लो क्रममा अनलाइन (टि.भी.आर.एस.) प्रविधि आए संगै राजस्वमा भने कमि देखिउको छ ।
