बर्षा यामको सुरुवातसगै बर्दियामा नदी सतहमा पानीको मात्रा बढेको छ । नदी तटीय क्षेत्रमा भएको प्राकृतिक स्रोत साधनको अत्यधिक दोहनका कारण नदीको प्राकृतिक बहावमा ठूलो परिवर्तन देखा पर्न थालेको छ । विकास निर्माणका ठूल्ठूला आयोजना, सिचाइ, सडक र पुल निर्माणका आयोजनाहरु संचालन हुँदा आवश्यक निर्माण सामग्री आपूर्तिका लागि नदीबाट गिट्टी बालुवा जस्ता नदीजन्य स्रोतहरु निकाल्दा अत्यन्तै सावधानी अपनाउन आवश्यक छ ।
बर्दियामा कर्णाली र बबईजस्ता ठूला नदीहरु रहेका छन । जिल्लाको पश्चिमी किनारमा रहेको कर्णाली नदी यस अघि कर्णाली र गेरुवा गरी दुई भागमा विभाजित भएर बग्ने गथ्र्यो । नदीको यस प्रकारको प्राकृतिक वहावले दुबैतिरका तटीय क्षेत्रमा पानीको आपूर्ति लगायत पर्यावरणीय सन्तुलनमा सकारात्मक प्रभाव पारेको थियो । अहिले नदीको वहाव पश्चिमी तटीय क्षेत्रमा केन्द्रित भएको छ । यसको पश्चिमी क्षेत्रमा कटान र बाढीको जोखिम उच्च बनेको छ भने पूर्वी क्षेत्रमा पानीको अभाव खट्किएको छ, परिणामस्वरूप पूर्वी तटीय क्षेत्रमा सिचाइ, निकुञ्जका जनावरहरुका लागि पानीको अभाव जस्ता समस्याहरु सिर्जना भएका छन् । त्यसै गरी बबई नदीको प्राकृतिक वहाव र प्राकृतिक स्रोतमा अत्यधिक मानवीय अतिक्रमणले बाढी, भूक्षय, कटान जस्ता समस्याहरु अनियंत्रित रूपमा बढ्न थालेका छन् । प्राकृतिक स्रोतको सदुपयोग गर्न सरकारले नीति नियम तथा विधि निर्माण गरेको छ । विधिको पूर्ण पालन गरौं र पालन गराउन सरोकारवाला निकायलाई जिम्मेवार बनाउन खबरदारी गरौं ।
