जिल्ला प्रशासन कार्यालय बर्दियाले एक सूचना जारी गर्दै हतियार (बन्दुक) नवीकरण प्रक्रियामा नयाँ व्यवस्था लागू भएको जानकारी गराएको छ । अबदेखि हतियार नवीकरणका लागि जिल्ला प्रशासन कार्यालयमा ल्याउनु नपर्ने व्यवस्था गरेको हो ।
हातहतियार खरखजाना ऐन तथा नियमावली बमोजिम हरेक आर्थिक वर्षमा हतियार नविकरण गर्नुपर्ने प्रावधान छ । तर, हतियार ल्याएर कार्यालयमा आउँदा सर्वसाधारणमा नकारात्मक असर पर्ने गुनासो बढेपछि नवीकरणमा नँया व्यवस्था लागू गरिएको जिल्ला प्रशासन कार्यालय बर्दियाका सहायक जिल्ला अधिकारी रोशन कुमार कठायतले सूचना मार्फत जानकारी दिएका छन् ।
नयाँ व्यवस्थाअनुसार बन्दुक धनीहरूले नजिकको प्रहरी चौकी, इलाका प्रहरी कार्यालय वा जिल्ला प्रहरी कार्यालयमा गई आफ्नो हतियारको चेकजाँच गराउनु पर्नेछ । त्यहाँबाट प्राप्त चेकजाँच फारम र लाइसेन्स सहित जिल्ला प्रशासन कार्यालयमा आएर नवीकरण प्रक्रिया पूरा गर्न सकिने व्यवस्था मिलाएको कुरा अधिकारी कठायतले जानकारी गराएका हुन् ।
जिल्ला प्रशासन कार्यालय बर्दियाले सबै हतियार धनीहरू लाई समयमै चेकजाँच गराई नवीकरण प्रक्रिया पूरा गर्न आग्रह गरेको छ ।
