गुलरिया, बैशाख ३१। बालविवाह, लैङ्गिक हिंसा अन्त्य र बाल संरक्षणलाई केन्द्रमा राखी किशोर–किशोरीहरूको समग्र विकासका लागि आज गुलरिया नगरपालिकामा विशेष छलफल कार्यक्रम सम्पन्न भएको छ।
कार्यक्रमको आयोजना सुनौलो महिला विकास बहुउद्देश्यीय सहकारी संस्थाले गरेको हो भने अध्यक्षता संस्थाकी इन्दिरा सुबेदीले गरेकी थिइन्।
गुलरिया नगरपालिकामा २०८१ सालमा वडा नं. ३, ४, ५ र ७ मा रूपान्तरण कक्षा सञ्चालन गरिएको थियो । जसमा १५७ जना किशोरी प्रत्यक्ष सहभागी भएका थिए। अप्रत्यक्ष रूपमा सहभागी संख्या ३७७ जना रहेको छ। आगामी २०८२ मा वडा नं. १०, ९, ७, ३, २, ४ मा विस्तार गर्दै करिब ५७२ जना किशोरी लाभान्वित हुने लक्ष्य लिएको सुवेदीले बताइन ।
छलफलमा सिद्धार्थ सामाजिक विकास केन्द्रका कार्यक्रम संयोजक एवं कार्यक्रमका सहजकर्ता नारायण घिमिरेले लुम्बिनी प्रदेश मा बालबालिकाको अवस्था र किशोरीहरुको समग्र विकासका लागि सञ्चालित ‘रूपान्तरण’ कक्षाको जानकारी दिए। उनका अनुसार, हालसम्म ५७२ जना किशोरीहरूले प्रत्यक्ष रुपमा लाभ लिएका छन् भने समुदाय र विद्यालय वाहिर रहेका किशोरी हरुका लागी कक्षा सञ्चालन भइरहेको छ।
सिद्धार्थ सामाजिक विकास केन्द्रका कार्यक्रम निर्देशक प्रकाश घिमिरेले संस्थाको उद्देश्य, कार्यक्षेत्र र रूपान्तरण कक्षाबाट विद्यालयबाहिर रहेका किशोरीहरूमा आएको सकारात्मक परिवर्तनको विवरण प्रस्तुत गर्दै रुपान्तरण कक्षा लाई अझै प्रभावकारी रूपमा अघी बढाउँदै लैजाने बताए ।
यूनिसेफका तर्फबाट धनेश्वरी धर्तीले बाल संरक्षण र लैङ्गिक हिंसाका विविध पक्षमा प्रकाश पार्दै यूनिसेफले रूपान्तरण कक्षा मार्फत किशोरीहरूलाई शिक्षित गर्दै अग्रसर बनाउँदै आएको जानकारी दिइन्। जसले गर्दा समाज लाई सही दिशा तर्फ मद्दत मिल्ले धर्तीले बताइन ।
कार्यक्रममा गुलरिया नगरपालिका वडा नं. ९ टेपरीस्थित रूपान्तरण कक्षाकी सहजकर्ता जमुना कुमारी पासीले आफ्नो अनुभव सुनाउँदै कक्षामा ६५ जना किशोरी सहभागी रहेको र बालविवाह अन्त्य, सामाजिक मूल्य–मान्यता, बाल संरक्षण लगायतका विषयमा सिकाई भइरहेको बताइन्।
यस्ता किसीमका कार्यक्रमले किशोरीहरूमा नेतृत्व विकास, आत्मविश्वास अभिवृद्धि र सामाजिक उत्तरदायित्वको भावना विकासमा टेवा पुर्याउने अपेक्षा गरिएको छ ।
