नेकपा एमालेको धनुषा जिल्ला अधिवेशनमा दुई पक्षबिच कुटाकुट भएको छ । उम्मेदवारको अन्तिम नामावलीबाट नाम हटाउने विषयमा विवाद हुँदा दुई पक्षबिच झडप भएको हो ।
शनिबारदेखि जारी अधिवेशनमा सर्वसम्मतबाट कार्यसमिति चयन हुन नसकेपछि मंगलबार बिहान ८ बजेदेखि निर्वाचनको तयारी गरिएको थियो ।
निर्वाचन कमिटीले सार्वजनिक गरेको उम्मेदवार नामावलीमा दाबी विरोध गर्दै एमाले केन्द्रिय सदस्य उमाशंकर अरगरिया पक्षले तीन जना पदाधिकारी पदका उम्मेदवारको नाम हटाउन माग गरेको छ । तर रघुबिर महासेठ पक्षको दबाब कारण निर्वाचन कमिटीले नाम हटाउन नमानेपछि दुई पक्षबिच कुटाकुट भएको हो ।
झडपमा दुई नेतासहित पाँच जना घाइते भएका छन् । घाइते हुनेमा एमालेका भोला यादव पक्षका सत्यनारायण महासेठ र महेश दास रहेका छन् । दुवै जनाको टाउको फुटेको छ ।
अधिवेशन स्थलमा दुई पक्षका कार्यकर्ताबिच ढुङ्गामुङ्गा तथा कुटपिट भएपछि तत्कालका लागि अधिवेशन स्थगित गरिएको छ ।
झडप भएपछि नेता अरगरिया पक्षका कार्यकर्ता निधि भवनको बाहिरबाट ढुङ्गामुङ्गा गरेपछि प्रहरीले सुरक्षा घेरा हालेर महासेठ पक्षका कार्यकर्तालाई अधिवेशन स्थलबाट बाहिर निकालेका थिए ।
एमाले धनुषाको अध्यक्षमा उम्मेदवारी दिएका लक्ष्मीनारायण यादव पक्षले नामावलीबाट नाम हटाउन धर्ना बसेको थियो। रघुवीर महासेठ पक्षले भोला यादवलाई अध्यक्षको उम्मेदवार बनाइएको छ । लक्ष्मीनारायण भने नेता उमाशंकर अरगरिया पक्षका उम्मेदवार हुन् ।
एमाले धनुषाको जिल्ला अधिवेशन शनिबार पार्टीका केन्द्रीय उपाध्यक्ष ईश्वर पोखरलेलले उद्घाटन गरेका थिए । मधेस प्रदेशमा एमालेका नेता महासेठ र लिला श्रेष्ठबीच उत्पादन विवादको असर धनुषा अधिवेशनमा देखिएको छ ।
साभार /नागरिक/सुरेन्द्र यादव
