जिल्ला प्रशासन कार्यालय काठमाडौँले एकाएक कठोर कदम चालेको छ । प्रशासनले केही स्थान तोकेर निषेध क्षेत्र आदेश जारी गरेको छ । प्रशासनले फागुन २५ देखि दुई महिनासम्मका निम्ति भन्दै निषेधित क्षेत्र सम्बन्धी आदेश जारी गरेको हो । जिल्ला प्रशासनले राष्ट्रपतिको कार्यालय शीतलनिवास, बालुवाटार, सिंहदरबार, लैनचौर, संसद् भवनसँगै नयाँ बानेश्वर आसपास स्थान तोकेर निषेध आदेश जारी गरेको छ । ती स्थानमा पाँच जनाभन्दा बढी व्यक्ति भेला भई अनशन, जुलुस, सभाजस्ता विरोधका कार्यक्रम गर्न निषेध गरिएको छ ।
पहिले पहिले पनि यसरी निषेधित क्षेत्र तोकिने गरिन्थ्यो । जसको चर्को विरोध प्रमुख प्रतिपक्ष दलले गरेको पाइन्थ्यो । तर यसपालि माहोल बदलिएको संकेत दिइरहेको छ ।
के हुन्छ होली ?
आगामी बिहीबार काठमाडौँ उपत्यकामा फागु पर्व (होली) रहेको छ । होलीमा हजारौँ मानिस बाहिर निस्केर होली खेल्ने गर्दछन् । जिल्ला प्रशासनले लगाएको यो निषेध आदेशले के गर्छ भन्ने खुलेको छैन ।
प्रशासनले आइतबार भएको राजावादीहरुको कार्यक्रमकै क्रममा निषेधित क्षेत्र तोकेसँगै यसले अन्योल छाएको छ ।
यदि प्रशासन कठोर बनेको हो भने होलीको मौकाको सदूपयोग गर्दै त्यस्तो गतिविधि हुन सक्ला । तर अब त्यही नाममा चाडपर्व पनि मनाउन नदिने हो भने त्यसले निम्त्याउने बेथिति पनि प्रशासनले पक्कै आँकलन गरेको होला ।
साभार हाम्राकुरा
