बर्दिया, मङ्सिर १० गते / बर्दिया जिल्लामा वन्यजन्तुबाट सबैभन्दा प्रभावित रहेको पालिका मध्येको एक मधुवन नगरपालिकाको वडा नम्बर १ स्थित पत्थरबोजीका महिलाहरूलाई कपासबाट धागो बनाई कपडा बनाउने तालिम सञ्चालन गरिएको छ। खाता कोरिडोरको बीचमा रहेको यस गाउँ पत्थरबोजिमा हरेक दिन जस्तो वन्यजन्तुले दुःख दिने गरेका छन्। यस मधुबन नगरपालिका वार्ड नं १ स्थित पत्थरबोजी गाउँका मानिसहरूको प्रमुख आयआर्जन भनेको कृषि सँगै घरपालुवा जनावर पाल्ने चलन रहिआएको र यही घरपालुवा जनावरको लागि प्रमुख आहारा भनेकै वन्यजन्तुको प्रमुख बासस्थान नजिकै रहेको वन जङ्गलमा चरिचरणका लागि लैजाने गर्दा जङ्गलमा उच्चतम मानव र वन्यजन्तुको द्वन्द्व निरन्तर रहिआएकोले जङ्गल जान वातावरण नरहने गरि घरै बसेर काम गर्न मिल्ने गरि कपासबाट धागो बनाई कपडा बुन्ने तालिमको आयोजना गरिएको मधुबन नगरपालिकाका नगरप्रमुख तेजबहादुर भाटले बताए ।
तालिमपछि तालिमको सदुपयोग गराउनको लागि चाहिने कच्चा पदार्थ र उत्पादन भएको कपडाहरुको बजारीकरण लागि समेत सहजीकरण गर्ने समेत नगरप्रमुख भाटले भने ।
यही मानव वन्यजन्तु द्वन्द न्यूनीकरणका लागि आयआर्जनका लागि हात तिम्रो साथी परियोजना अन्तर्गत मधुबन नगरपालिका वार्ड नं १ मा कपासबाट धागो बनाई कपडा बुन्ने तालिमको आयोजना गरिएको उज्यालो नेपालका प्रमुख नवराज न्यौपानीले जानकारी दिए।
यस किसिमको तालिम दिएर कपासबाट कपडाहरू उत्पादन गर्न लगाएर स्थानीयको आयर्जनमा सपोर्ट हुने समेत उज्यालो नेपालका प्रमुख न्यौपानेले जानकारी दिए। तालिममा २० जना महिलाहरूको सहभागिता रहने र यो तालिम ४५ दिनसम्म सञ्चालन हुने समेत न्यौपानीले बताए।
यो योजना मधुवन नगरपालिका, डिभिजन वन कार्यालय बर्दिया, बर्दिया राष्ट्रिय निकुञ्ज खाता सामुदायिक वन समन्वय समिति बर्दिया र ओझान नेपालको सहजीकरणमा सञ्चालन भएको समेत उनले बताए।
