गोविन्द बहादुर थापा, बर्दिया, फाल्गुण २९ गते / ठाकुरबाबा नगरपालिका ४ मैनवार गाउँका स्थानीयलाई विद्युतीय चुल्हो वितरण गरिएको छ ।
बबई उपभोक्ता समिती मातहतको मैनवार मध्यवर्ती सामुदायिक वन उपभोक्ता समुहका सदस्यहरुलाई फागुन २८ गते एक कार्यक्रमका बिच विद्युतीय चुल्हो वितरण गरिएको हो । मैनवार गाउँका १ सय ४३ घरधुरीलाई चुल्हो वितरण गरिएको बबई उपभोक्ता समितीका अध्यक्ष चक्रप्रसाद खनालले जानकारी दिनुभयो ।
सोमबार एक कार्यक्रमकाबीच बर्दिया राष्ट्रिय निकुञ्जका वरिष्ठ संरक्षण अधिकृत डा. अशोकरामले मैनवार मध्यवर्ती सामुदायिक वन समुहमा आवद्ध १ सय ४३ सदस्यहरुलाई विद्युतीय चुल्हो वितरण गर्नुभएको हो ।
पछिल्लो समय राष्ट्रिय निकुञ्जसँगसँगै सामुदायिक वन क्षेत्रमा मानव र वन्यजन्तुबीचको द्वन्द्व बढेसँगै मानवीय क्षति कम गर्न र मानव–वन्यजन्तुबीचको द्वन्द्व न्यूनिकरण गरी सहअस्तित्व कायम गराउने उद्देश्यले विद्युतीय चुल्हो वितरण गरिएको अध्यक्ष खनालले बताउनुभयो ।
विद्युतीय चुल्हो पाएसँगै समुहका सदस्यहरुले खुशी व्यक्त गर्दै वन संरक्षणमा हातेमालो गरेर अघि बढ्ने बताएका छन् । चुल्हो वितरण गरिएसँगै कसरी प्रयोग गर्ने भन्ने बिषयमा जानकारी समेत गराइएको उहाँले बताउनुभयो ।
मानव–वन्यजन्तुबीचको द्वन्द्व न्यूनिकरणमा सहयोग पुग्नुकासाथै दाउराको खपत घटाई वैकल्पिक उर्जाको प्रयोग बढाउन र भान्सा गर्दा दाउराको प्रयोगबाट निस्कने धुँवाका कारण स्वास्थ्यमा पर्ने असर कम हुने अपेक्षा गरिएको जनाइएको छ ।
चुल्हो वितरण कार्यक्रममा मैनवार मध्यवर्ती सामुदायिक वन उपभोत्ता समुहका अध्यक्ष क्रिमलाल थारुको अध्यक्षता एवम् बर्दिया राष्ट्रिय निकुञ्जका वरिष्ठ संरक्षण अधिकृत डा. अशोकरामको प्रमुख आतिथ्ययता तथा पूर्व राष्ट्रिय सभा सदस्य रंगनाथ जोशीको बिशेष अतिथ्ययता रहेको थियो ।
