काठमाडौं, माघ १५/मुगुको छायाँनाथ रारा नगरपालिकाका तत्कालिन निमित्त प्रमुख प्रशासकीय अधिकृतसहित १० जनाविरूद्ध भ्रष्टाचारको मुद्दा दर्ता भएको छ। अख्तियार दुरूपयोग अनुसन्धान आयोगले सोमबार काठमाडौंस्थित विशेष अदालतमा १० जना विरूद्ध मुद्दा दायर गरेको प्रवक्ता नरहरि घिमिरेले जानकारी दिए।नगरपालिकाको वडा नम्बर ७ र ८ को ताल्चा सल्लेरी सडक स्तरोन्नति गर्ने काममा भ्रष्टाचार गरेको भन्दै अख्तियारले अनुसन्धान थालेको थियो।
अनुसन्धान पछि अख्तियारले तत्कालिन निमित्त प्रमुख प्रशासकीय अधिकृत पिताम्बर सारु, इञ्जिनियर महेश सिंह कठायत, असिस्टेन्ट सव-इञ्जिनियर हस्तबहादुर मल्ल, सडक निर्माण उपभोक्ता समितिका अध्यक्ष उनबहादुर शाही, सचिव राधिका रावल, कोषाध्यक्ष बिजुली मल्ल, सडक निर्माण अनुगमन समितिका सदस्य चक्रबहादुर सावत, सदस्य हजरकला कामी, कर्ण रावल र पशुपति शाहीविरूद्ध मुद्दा दायर गरेको हो।
सडक स्तरोन्नतिको कामका लागि हार्ड स्वायल, सफ्ट रक, मिडियम रक र हार्ड रक कटिङ मानिसबाट गराएको भनेर कामको बढी मूल्याङ्कन गराई नापी किताब, प्राविधिक विल र कार्यसम्पन्न प्रतिवेदन तयार पारेको देखिएको छ। उनीहरूले २८ लाख ६२ हजार ४५९ रुपैयाँको भ्रष्टाचार गरेको अख्तियारले जनाएको छ। उक्त बिगो कायम गरी कैद र जरिवानाको सजाय मागदाबी गरिएको छ। साभार सेतोपाटी
