बर्दिया,मंसिर २८(माउण्टेनसमाचार) / प्रादेशिक कृषि, पर्यटन तथा औद्योगिक व्यापार महोत्सव २०८० गुलरियाको उद्घाटन लुम्बिनी प्रदेशका मुख्यमन्त्री डिल्ली बहादुर चौधरीले गर्ने भएका छन् । पौष ६ गते गते देखि १६ गतेसम्म चल्ने महोत्सवको उद्घाटन मुख्यमन्त्री चौधरीले गर्ने आयोजकले जनाएको हो ।
उद्योग वाणिज्य संघ गुलरियाले आयोजना गरेको महोत्सवको तिब्र रुपमा तयारी भईरहेको जनाईएको छ । गुलरिया नगरपालिका–८ कोठिया गाउँ नजिक लाग्ने महोत्सवको तयारी भईरहेको छ । त्यसैगरि महोत्सवको प्रचार प्रसार पनि तिव्र पारिएको जनाईएको छ ।
महोत्सवको सम्पुर्ण तयारी अन्तिम चरणमा पुगेको उद्योग वाणिज्य संघ गुलरियाका अध्यक्ष देवेन्द्र पाण्डेले बताएका छन् । महोत्सवको एरिया घेराउ तथा महोत्सव भित्र स्टल र स्टेजको निर्माण भईसकेको छ । अब सजावट गर्न मात्र बाँकी छ । त्यसैगरि झुला,रेललगायतका चिजहरु लगाउने काम भईरहेको छ । सुरक्षा व्यवस्थाको लागि प्रशासन कार्यालयलाई अनुरोध गरिसकेको अध्यक्ष पाण्डेले जनाए ।
प्रादेशिक कृषि, पर्यटन तथा औद्योगिक व्यापार महोत्सवले समग्र जिल्ला भित्र रहेका पर्यटन, संस्कृति, कृषि उत्पादनलगायत बस्तुहरुको व्यापक प्रचार प्रसार गर्नेछ ।
