बर्दिया,मंसिर १९ / दलित महिला र बालिकाहरु हिंसाको चपेटामा परेको र न्यायमा पहुँच नभएको आम सरोकारवालाहरुले बताएका छन । अझैपनि दलित समुदायका महिला तथा बालबालिकाहरुले हिंसाको सिकार भइरहेको भन्दै न्यायको पहुँचमा समेत ढिलाई हुने गरेको बताइएको छ । लैगिक हिंसा विरुद्धको १६ दिने अभियानको सन्दर्भमा : दलित महिला संघ (फेडो) ले दलित महिला र बालिका माथि भएका हिंसाको अध्ययन प्रतिवेदन सार्वजनिकिकरण गर्ने कार्यक्रमका सहभागीले यस्तो धारणा सार्वजनिक गरेका हुन ।
नेपालको संविधानले हरेक समुदायको हक अधिकार तथा न्यायका लागी विभिन्न आयोग एवं नितिगत व्यवस्था गरिएको छ । हिंसा पिडितलाई कानुनी बाटोमा ल्याई हरेक हिंसा प्रभावितलाई न्यायको पहुँचमा ल्याउनु पर्ने बार एशोसिएसन बर्दियाका अध्यक्ष एवम् अधिवक्ता कमल पाण्डेले आग्रह गर्नु भयो । लैङ्गिक हिंसा बिरुद्धको १६ दिने अभियान अन्तर्गत नेपालमा दलित महिला र बालिका माथि हुने हिंसाको अवस्था अध्ययन प्रतिवेदन दलीत महिला संघ (फेडो) बर्दियाकी अध्यक्ष हेमा सुनारले सार्वजनीक गर्नु भएको छ ।
विभिन्न कालखण्डमा दलित महिला तथा बालबालिका माथी भएका दमन तथा अन्याय विरुद्ध न्यायालयमा पुग्दा अझै कतिपयले न्याय नपाएको बताउनु भयो । दलित समुदाय माथी भएका जुनसुकै हिंसा तथा विभेद बारे न्यायालयले अवश्य न्याय दिलाउने विश्वास व्यक्तगर्दै अध्यक्ष सुनारले प्रहरीको तथ्यांक अनुसार आ.ब. ०७९/८० मा २० हजार ७ सय २ जना महिलाहरू हिंसामा परेको जसमध्ये २ हजार ५ सय ३५ जना दलित महिलाहरू हिंसामा परेको तथ्यांक सार्वजनिक गर्नु भयो । समाजमा सवैले समान र सम्मान रूपले बाच्न पाउनु पर्ने अधिकारको सुनिश्चितता भएता पनि २१ औं शताब्दीमा यस्ता हिंसा एवं विभेदका घटना हुनु दुःखद भएको सुनारको भनाई थियो ।
जिल्लामा गत २ बर्षमा जातिय बिभेदको मुद्वा दर्ताको संख्या शून्य रहेको छ । समाजमा सरोकारवाला निकाय आ–अआफनो स्थानमा संबेदाश्लि भएमा यस्ता घटना न्यूनिकरणमा मद्दत गर्नुपर्ने गुलरिया नगरपालिकाकी नगरउप्रमुख सावित्रा गौतमले बताउनु भयो । दलित महिला माथि हुने हिंसाको दलित समुदायले मात्र होइन गैरदलित समुदाय लगायत सवै मिलेर प्रतिकार गर्नु पर्ने गौतमले जोड दिनु भयो ।
जिल्ला प्रहरी कार्यालय बर्दियाका अनुसार जिल्लामा चालु आ.व.मा ६१ वटा मुद्धा मध्ये जबरजस्ति करणी १९, जबरजस्ती करणी उद्योग ६, बहुविवाह ३, बालविवाह १, कर्तब्य ज्यान ४, आत्महत्या २२ आत्महत्या दुरुत्साहन १ बाल यौनदुव्र्यवहार २ र अभद्र व्यवहारको १ वटा मुद्धा दर्ता भएको महिला, बालबालिका तथा जेष्ठ नागरिक सेवा केन्द्र बर्दियाकी प्रहरी सहायक निरिक्षक सरस्वती पौडेलले जानकारी गराउनु भयो ।साभार चुरेकुञ्ज
