बर्दिया,मंसिर १४ (माउण्टेनसमाचार) / ठाकुरबाबा नगरपालिका–६ स्थित गिठेनाला सिँचाई आयोजनाको अलपत्र रहेको बाँकी काम तत्काल नगरे सम्बन्धित कार्यालय घेराउ गर्ने उपभोक्ताहरुले चेतावनी दिएका छन् । आयोजनाको बाँकी काम तत्काल नभए जलस्रोत तथा सिचाई विकास डिभिजन कार्यालय बर्दिया घेराउन गर्ने उपभोक्ताले जिल्ला प्रशासन कार्यालयमा बिहीबार निवेदन दिदै चेतावनी दिएका हुन् ।
उक्त आयोजना कार्यान्वयका लागि ६ वर्ष पहिले सम्झौता भई ठेक्का भएको थियो । आयोजनाको जेभि कन्ट्रक्सन कम्पनीले ठेक्का पाएको थियो । ठेक्का पाएको कम्पनीले समयमै काम सम्पन्न नगर्दा ठाकुरबाबा नगरपालिका–६ र ७ का किसान मारमा परेका छन् । आयोजना कार्यान्वयन नहुँदा यस वडाका किसानहरु आकासे पानीको साहारामा खेती गर्न बाध्य छन् । कम्पनीले गिठेनाला सिँचाई आयोजनाको काम समयमै सम्पन्न गरेको भए १ हजार बिगाह जमिनमा किसानहरु कम लागतमा सिँचाई गर्न सक्छन् ।
आयोजनाको केही काम भई बाँकी काम अलपत्र रहेको छ उक्त ठेकेदारको चरम लापरवाही र सम्बन्धित जलस्रोत तथा सिचाई विकास डिभिजन कार्यालयको उदासिनताका कारण काम हुन नसकेको उपभोक्ताले बताउँछन् । उपभोक्ताहरुले पटक पटक सम्बन्धित निकायको ध्यानाकर्षण गराउँदा उल्टै थर्काएको गिठेनाला सिँचाई जल उपभोक्ता समिति ठाकुरबाबा नगरपालिका–६ का अध्यक्ष बल बहादुर थारुले बताए ।
उक्त कम्पनीले स्थानीय व्यापारीबाट लिएको सामाग्रीहरुको, स्थानीय लेबर र मिस्त्रीहरुको करिब ५० लाख भुक्तानीसमेत नदिएको जनाईएको छ । बाँकी काम सम्पन्न गर्न र भुक्तानीको माग गर्दै उपभोक्ता समितिले बिहीबार जिल्ला प्रशासनमा निवेदन दिएको छ । यदि हाम्रो माग ७ दिन भित्र सम्बोधन नभएमा सम्बन्धित कार्यालय घेराउ गरि जनदवाव सृजना गर्ने निवेदनमा उल्लेख छ ।
