काठमाडौँ, कात्तिक ९ गते / आईसीसी एकदिवसीय विश्वकप क्रिकेट प्रतियोगितामा बुधबार अस्ट्रेलियाले नेदरल्यान्ड्समाथि तीन सय नौ रनको कीर्तिमानी जित हासिल गरेको छ । दिल्लीस्थित अरुण जेट्ली स्टेडियममा टस जिती पहिले ब्याटिङ गरेको अस्ट्रेलियाले निर्धारित ओभरमा आठ विकेट गुमाएर तीन सय ९९ रन बनायो ।
जवाफी ब्याटिङमा ओर्लिएको नेदरल्यान्ड्सले २१ ओभरमै अलआउट हुनुअघि ९० रनमात्र बनाउन सक्यो । आईसीसी एकदिवसीय विश्वकपको इतिहासमा कुनै पनि टोलीले रनका आधारमा हासिल गरेको यो सबैभन्दा फराकिलो अन्तरको जित हो ।
यसअघि सन् २०१५ को विश्वकपमा अस्ट्रेलियन टोलीले अफगानिस्तानलाई दुई सय ७५ रनले हराएको थियो । पहिले ब्याटिङ गरेको अस्ट्रेलियाका लागि ओपनर डेभिड वार्नर र ग्लेन म्याक्सवेलले सतकीय पाली खेलेका थिए ।
वार्नरले ९३ बलमा तीन छक्का र ११ चौकाको मद्दतले एक सय चार रन बनाए । म्याक्सवेलले केवल ४४ बलको सामना गरी आठ छक्का र नौ चौकाको मद्दतले एक सय ६ रनको योगदान गरे ।
अस्ट्रेलियाका लागि स्टिभन स्मिथ र मार्नुस लाम्बुसेनले अर्धसतक बनाए । स्मिथले ६८ बलमा एक छक्का र नौ चौकाको मद्दतले ७१ रन बनाए । लाम्बुसेनले पनि ४७ बलमा दुई छक्का र सात चौकाको मद्दतले ६२ रन प्रहार गरेका थिए ।
नेदरल्यान्ड्सका बलर लोगन भान बिकले चार विकेट लिए । जवाफी ब्याटिङमा ओर्लिएको नेदरल्यान्ड्सका कुनै पनि ब्याट्सम्यान लामो समय क्रिजमा टिक्न सकेनन् । ओपनर बिक्रमजित सिंहले सर्वाधिक २५ रन बनाएका थिए ।
अस्ट्रेलियाका बलर एडम जाम्पाले चार विकेट लिए । उनी जारी विश्वकपमा हालसम्म सर्वाधिक विकेट लिने बलर पनि बनेका छन् । उनले लिएको विकेट सँख्या १३ पुगेको छ ।
मिचेल मार्सले पनि दुई विकेट हात पारे । मिचेल स्टार्क, जोस हेजलउड र प्याट कुमिन्सले पनि एक—एक विकेट हात पारे ।
