बर्षा र गर्मीको कारण खाल्डा तथा तलाउमा पानी जम्ने र झारपात बढेर फोहर हुने हुँदा लामखुट्टेको सङ्ख्या बढ्दै छ । लामखुट्टेको टोकाइबाट औलो, डेङ्गु, इन्सेफ्लाइटिस जस्ता रोगहरु को जोखिम बढ्दै गइरहेको छ । बर्दिया जिल्लाका सबैजसो स्वास्थ्य संस्था र विशेष गरी बर्दिया जिल्ला अस्पतालमा अहिले बिरामीहरुको चाप बढ्दो देखिन्छ । बर्दिया जिल्ला बाहिर भेरी अस्पताल नेपालगन्ज र मित्र राष्ट्र भारतमा गएर उपचार गराउने बिरामी हरुको सङ्ख्या समेत उल्लेख्य छ । जिल्लामा उपचारका लागि बिरामीको चाप धान्ने स्वास्थ्य संस्थाको अभाव छ । अहिलको जनसंख्या र बिरामीको चाप हेर्ने हो भने हाम्रो बर्दिया जिल्ला अस्पतालले धान्न सक्ने अवस्था छैन । बर्दिया जिल्ला अस्पताललाई अब १०० भन्दा बढी शैयाको गुणस्तरीय अस्पतालका रूपमा रुपान्तरण गर्नु आवश्यक भएको छ । यसका साथै स्वास्थ्य क्षेत्रमा दक्ष जनशक्तिको उपलब्धता र टिकाउपन अर्को चुनौतीका रूपमा रहेको छ ।
एकातिर नागरिकका लागि उपचारको प्रबन्ध मिलाउन स्तरीय स्वास्थ्य संस्थाको व्यवस्थापन आवश्यक छ भने अर्कोतिर नागरिकहरुलाई रोग लाग्न बाट बचाउन सचेत बनाउन समेत आवश्यक छ । यो मौसममाअधिकाङ्श नागरिकहरु विभिन्न प्रकारका रोगबाट प्रभावित हुने सम्भावना रहन्छ । रोग लागेर उपचार गर्नु भम्दा रोग लाग्नबाट बच्नु बुद्धिमानी हो । जिल्लास्थित स्वास्थसग संबंधित निकाय तथा स्थानीय तहहरुले लामखुट्टे नियन्त्रण गर्ने अभियान संचालन गर्न आवश्यक छ । लामखुट्टेको टोकाइबाट बच्न समेत नागरिक सचेतता अपनाउन अभियान संचालन गर्न सरोकारवाला पक्ष जागरुक हुन नितान्त आवश्यक छ । साथसाथै लामखुट्टे नियन्त्रण गर्न औषधि छर्ने अभियान लागायतका लामखुट्टेको टोकाइबाट लाग्ने रोग विरुद्ध प्रतिरोधात्मक अभियान चलाउनु आवश्यक छ ।
