बर्दिया(ठाकुरबाबा), फागुन २६ गते ठाकुरबाबा नगरपालिकामा विपन्न परिवारका लागि ९ बटै वडामा १ सय २ घर निर्माण कार्यको सुरुवात गरिएको छ। विपन्न घरपरिवारका लागि निर्माण हुने घर मध्ये हरेक वडामा एक जना अपांगता भएका परिवारका लागि घर बन्ने ठाकुरबाबा नगरपालिकाले जानकारी दिएको छ ।
बर्दियाको ठाकुरबाबा नगरपालिका वडा नम्बर ५ तकिया गाउँका एक जना पूर्ण अपांगता भएकाका लागि ३ लाख ७५ हजार पालिकाको सहयोग र अन्य साझेदारीमा घर निर्माण सुरु भएको ठाकुरबाबा नगरपालिकाका नगरप्रमुख तिलकराम लम्सालले जानकारी दिए ।
नगरपालिका भित्रका १ सय ५० जनाले विपन्न आवासका लागि निवेदन दिएका थिए जसमध्ये यस वर्ष मुक्तकमैया, सुकुम्बासी, २०७१ सालका बाढी पीडित तथा वन्यजन्तु पीडित गरि १ सय २ विपन्न परिवारका लागि घर निर्माण गर्न थालिएको हो नगरप्रमुख तिलकराम लम्सालले भने ।
अपांगता भएका ९ घरपरिवारका लागि ३ लाख ७५ हजारमा उर्जा प्रभावकारी भवन निर्माण हुने र अन्य ९३ घरपरिवार विपन्नका लागि १ लाख ७५ हजार रुपैयाँमा पालिकाको सहयोग र साझेदारीमा निर्माण हुने लम्सालले जानकारी दिए ।
अपांगता भएका ९ वटा वडाका ९ जनालाई उर्जा प्रभावकारी भवनका लागि प्रति घर निर्माणका लागि ३ लाख ७५ हजार र ९३ जना विपन्नलाई प्रति घर निर्माणका लागि १ लाख ७५ हजार गरि कुल १ करोड ९६ लाख ५० हजार रकम प्रदान गरिने नगरप्रमुख तिलकराम लम्सालले बताए ।
विन परियोजना र स्थानीयको साझेदारीमा ऊर्जा प्रभावकारी र वातावरणीय मैत्री भवन निर्माण भइरहेको ठाकुरबाबा नगरपालिकाका उपप्रमुख विना कुमारी भट्टराईले जानकारी दिनुभयो । गर्मीमा चिसो, चिसोमा न्यानो हुने र बिजुलीसमेत कम खपत हुने घरहरु यसै आर्थिक वर्षभित्र निर्माण सम्पन्न भइसक्ने उपप्रमुख भट्टराईले बताउनुभयो ।
भवन निर्माणका लागि नगरपालिका भित्रका स्थानीय २७ जनालाई उर्जा प्रभावकारी भवन निर्माणका लागि प्रशिक्षण दिईएको छ भने आर्थिक सहयोग र नितीगत रुपमा ठाकुरबाबा नगरपालिकासँग सहकार्य गरी प्रभावकारी संरचना निर्माण भइरहेको विन परियोजनाका इन्जिनियर अभिषेक कर्णले बताए ।
