बर्दिया, फागुन १६ गते / बारबर्दिया नगरपालिका न्यायीक समितिको सहजिकरणमा कृषकहरुलाई बाख्रा पालन तालिम सम्पन्न भएको छ । बारबर्दिया नगरपालिका न्यायीक समितिको आयोजनामा मुक्त कमलरीका घरपरिवारका लागि संचालित सीप तथा आयआर्जन मुलक ५ दिने बाख्रा पालन तालिमका साथै सहभागी कृषकहरुलाइ बाख्रा फार्मको अवलोकन गराइएको पशु शाखाका दीपक थापाले जानकारी दिए ।
फागुन १५ गते अवलोकनका लागि कृषि अनुसन्धान निर्देशनालय खजुरा, बाँकेमा रहेको बाख्रा फार्मको अवलोकन गराइएको र तालिममा सहभागी ४३ जना कृषकको सहभागिता रहेको थापाले बताए ।
तालिममा सिकेका कुराहरु र अवलोकनका क्रममा देखिएका कुराबाट बाख्रा पालन के कसरी गर्ने भन्ने राम्रो जानकारी प्राप्त भएको तालिम र अवलोकनमा सहभागी एक महिलाले बताइन् । तालिममा सिकाइएको कुरालाई आयआर्जनमा जोड्ने गरि तालिमको सदुपयोग गर्ने अर्का एक सहभागीले भनिन् । तालिम लिए पछि कसरी बाख्रा पालन गर्दा बाख्राबाट बढि भन्दा बढि फाइदा लिन सकिन्छ भन्ने र कसरी स्याहारसुसार गर्ने र कसरी राम्रा बाख्राहरु उत्पादन गरि आयआर्जन बढाउन सकिन्छ भन्ने राम्रो जानकारी प्राप्त गरेको र यो तालिमलाई व्यवहारमा लागू गर्ने तालिममा सहभागीले बताए ।
