फागुन १५ गते / बर्दियाको बैरियाघाट र पण्डितपुरमा मल्टीस्पान झोलुङ्गे पुल आज देखि सञ्चालनमा आएको छ । आज एक कार्यक्रमका बिच नेपाली काङ्ग्रेसका केन्द्रीय सदस्य एवं बर्दिया क्षेत्र नं १ का संघीय सांसद सञ्जय कुमार गौतमले झोलुङ्गे पुलको उद्घाटन गरेका छन ।
झोलुङ्गे पुलको निर्माण संगै बारबर्दिया नगरपालिका र गुलरिया नगरपालिकाका स्थानीय बासिन्दाहरुलाई सहज तरिकाले आउजाउ गर्न र कृषकहरुले आफ्नो उत्पादन सदरमुकाम बजारमा बिक्रिका लागि लैजान सजिलो रहने संघीय सांसद सञ्जय कुमार गौतमले बताए ।
बंबई नदिमै बनेका बालापुर झोलुङ्गे पुल र कुसुम्बाघाट झोलुङ्गे पुल यो बैरियाघाटको झोलुङ्गे पुल पनि संगै बन्नुपर्ने थियोे तर अन्य केही साथीहरूको गलत बुझाइका कारण झोलुङ्गे पुल ढिलो गरि बनेको कुरा गौतमले जानकारी गराए । यो झोलुङ्गे पुल बने पछि हजारौं स्थानीयहरुलाइ आउजाउ गर्न सहज हुने समेत उनले बताए ।
झोलुङ्गे पुल बनाउनमा माननिय सांसद सञ्जय कुमार गौतमको अथक प्रयास र सहजिकरणले यो पुल निर्माण भएकोले यहाँका स्थानीयका लागि माननीय सञ्जय कुमार गौतम धन्यवाद पात्र रहेको बारबर्दिया नगरपालिका नगरप्रमुख छविलाल थारुले बताए । पुल सुचारु संगै बारबर्दिया र गुलरियामा झनै आत्मिय र भावनात्मक एकता झनै जोड्ने कुरा समेत नगरप्रमुख छविलाल थारुले भने ।
शहरी विकास मन्त्रालय, स्थानीय पूर्वाधार विभाग सस्पेन्सन ब्रिज डिभिजन, पुल्चोक, ललितपुरको लगानीमा श्री थानी निर्माण सेवा प्रा.लि.द्वारा निर्मित उक्त पुल सञ्चालनमा आएपछि दुई पाङ्ग्रे सवारीसाधन सञ्चालनमा समेत सहज भएको छ ।
यसअघि, स्थानीयवासीलाई बबई नदी पार गर्न डुङ्गाको भर पर्नुपर्दथ्यो । झोलुङ्गे पुल सञ्चालनमा आएपछि सदरमुकाम गुलरिया जाँदा आउँदा ढुङ्गा तर्नुपर्ने झन्झट हटेको छ ।
मोटरसाइकल, साइकल तथा पैदलयात्रीहरू दिनरात यात्रा गर्न सक्ने भएकाले स्थानीयवासीले सहज महसुस गरेका छन् । बारबर्दिया–४ का स्थानीय खुसीराम चौधरीका अनुसार पुल सञ्चालन भएसँगै दैनिक आवतजावत सरल भएको छ ।
सस्पेन्सन ‘एमएन’ प्रविधिबाट निर्मित उक्त पुल ४ सय १२.९८ मिटर लम्बाइको छ, जसको भारबहन क्षमता १ सय ११ टन रहेको छ । पुलमा एकै पटक ८ सय २ जना पैदलयात्री आवतजावत गर्न सक्छन् । पुल बनेपछि स्थानीय बासिन्दा दैनिकरूपमा यसलाई हेर्न र घुम्न आउने गरेका छन् भने व्यावसायिक सम्भावनाका रूपमा खाजा पसलहरू खुल्न थालेका छन् ।
उद्घाटन कार्यक्रममा बारबर्दिया नगरपालिका बाड नं ४ का बडा अध्यक्ष एवं बारबर्दिया नगरपालिकाका नगर प्रवक्ता सिताराम योगि, बारबर्दिया नगरपालिका ४ का बडा अध्यक्ष रामफेरन थारु, गुलरिया नगरपालिका बाड नं ४ का बडा अध्यक्ष सुरेश गौतम, गुलरिया १ का बडा सदस्य प्रेम यादव का साथ राजनीतिकर्मि शम्भु प्रसाद रिजाल लगायत स्थानीयहरुको सहभागीता रहेको थियो ।
