बाँके, पुस २६ गते / राष्ट्रिय सहमति कायम गरेर संविधान संशोधन र पुनरावलोकनमा जानुपर्ने नेपाली कांग्रेसका केन्द्रीय सदस्य एवम् पूर्व मन्त्री एनपी साउदले बताएका छन् ।
नेपाल प्रेस युनियन बाँकेले आज बिहान नेपालगन्जमा आयोजना गरेको पत्रकार सम्मेलनमा नेता साउदले संविधानका कमीकमजोरी हटाउन र संविधानलाई अझ जनमुखी बनाउन आवश्यक संशोधनका लागि कांग्रेस राष्ट्रिय सहमति बन्नुपर्ने पक्षमा रहेको स्पष्ट पारे ।
उनले सुशासन र समृद्धि हासिल गर्न दुई ठुला दल कांग्रेस र एमाले गठबन्धन सरकारमा रहेको बताउँदै मुलुकमा भ्रष्टाचार चुनौतीकै रूपमा रहेको उल्लेख गरे । साउदले सरकारको ‘पर्फर्मेन्स’ उच्चस्तरको हुनुपर्नेमा जोड समेत दिए । अर्थतन्त्र दबाबमै रहेको भन्दै उनले सरकारसामु थुप्रै चुनौती रहेको बताए ।
केन्द्रीय सदस्य साउदले सरकार, गठबन्धन र पार्टीका बारेमा बुझ्न आफूहरू जिल्ला भ्रमणमा रहेको जानकारी दिए । जिल्ला भ्रमणमा रहेको टोलीमा साउदसँगै केन्द्रीय सदस्यहरू डा. डिला सङ्ग्रौला, गोविन्द बहादुर शाह, अब्दुल सत्तार र चम्पा खड्का छन् ।
