बर्दिया,माघ ८ गते / लागुऔषध चरेशसहित बर्दिया प्रहरीले एक जनालाई पक्राउ गरेको छ । बढैयाताल गाउँपालिका–६ मैनापोखर स्थितबाट इलाका प्रहरी कार्यालय मैनापोखर प्रहरीले लागु औषध चरेशसहित शनिबार साँझ एक जनालाई पक्राउ गरेको हो ।
पक्राउ पर्नेमा जाजरकोट जुनिचाँदै गाउँपालिका–५ मईपका १९ वर्षिय कृष्ण थापा रहेका छन् । इलाका प्रहरी कार्यालय मैनापोखरका इन्चार्ज प्रहरी निरीक्षक राजेश साहुको नेतृत्वमा खटिएको प्रहरी टोलीले थापालाई लागु औषधसहित पक्राउ गर्न सफल भएको हो । शंकास्पद रुपमा रहेका थापालाई नियन्त्रणमा लिई चेकजाँच गर्दा लागु औषध चरेश फेला परेको प्रहरीले जनाएको छ ।
थापाले बोकेको झोलाभित्र पहेलो रङको प्लाष्टिकले बेरेर लुकाई राखेको अवस्थामा चरेश फेला परेको हो । प्रहरीका अनुसार बरामद लागु औषध चरेश २ किलोग्राम ९६ ग्राम रहेको छ । लागु औषध चरेशसहित थापालाई नियन्त्रणमा लिई जिल्ला अदालतबाट ५ दिनको म्याद लिई थप अनुसन्धान भईरहेको जिल्ला प्रहरी कार्यालय गुलरियाका डिएसपी ऋषिराम घर्ती मगरले जानकारी दिए ।
