दीपकलाल श्रेष्ठ
चैत्र १५ गते / बर्दियामा भन्सार छली चोरी पैठारी गरी तोरीको कारोबार हुने गरेको स्थानीयको जनगुनासो आए संगै चैत १४ गते बिहान बर्दियाको गुलरियामा प्रहरीले ४५ क्विन्टल तोरी सहित नौ जनालाई पक्राउ गरेको छ। गोप्य सूचनाको आधारमा लुम्बिनी प्रदेश प्रहरी कार्यालय दाङको प्रहरी टोली र बर्दिया प्रहरीको संयुक्त टोलीले बर्दियाको गुलरिया नगरपालिका वार्ड नं ११ स्थित भादापुल सिमानाका बाट चोरी पैठारी गरी ल्याएको ९६ वटा बोरामा ४५ क्विन्टल तोरी, ८ थान अटो र १ थान मोटरसाइकल पक्राउ गरिएको जिल्ला प्रहरी कार्यालय बर्दियाका प्रहरी नायब उपरीक्षक प्रवेश बिष्टले जानकारी दिए। चैत १४ गते बिहान करिब ४ बजे पक्राउ परेको सामग्रीहरू करिब १६ लाख ८० हजार बराबर रहेको र सबै सामग्री र पक्राउ परेकालाइ राजापुर भन्सार कार्यालय गुलरिया बर्दियामा बुझाइएको समेत प्रहरी नायब उपरीक्षक बिष्टले बताए।
पक्राउ परेका व्यक्तिहरूमा गुलरिया नगरपालिका वार्ड नं १० का ल्याकत अली, गुलरिया नगरपालिका वार्ड नं ८ बस्ने ३० वर्षीय नसिम मनिहार, बराती मनिहार, राजा मनिहार र सकील मनिहार रहेका छन् भने गुलरिया नपा ९ का आलिक तेली जावेद, अहमद जोहाल, जाहिद अलि अन्सारी र अनिप अनिहार रहेको समेत बिष्टले जानकारी दिए।
पछिल्लो क्रममा यस क्षेत्रमा भन्सार छरी गरी चोरी पैठारी गरी तोरीको कारोबार भइरहेको स्थानीयको जनगुनासो रहिआएको थियो। जनगुनासो मध्यनजर गर्दै लुम्बिनी प्रदेश प्रहरी र बर्दिया प्रहरीले ठूलो मात्रामा अवैध तोरी पक्राउ गरेकोमा प्रहरी धन्यवादको पात्र रहेको स्थानीयले बताएका छन्।