“बालबालिकाको सिकाइमा अभिभावकको भूमिका र जिम्मेवारी” विषयक दुई दिने अभिमुखीकरण कार्यक्रम सम्पन्न भएको छ ।
“शसक्त बालिका परियोजना” अन्तर्गत प्लान इन्टरनेशनल नेपालको साझेदारीमा बाँके युनेस्को क्लबले आयोजना गरेको उक्त कार्यक्रममा गुलरिया, मधुवन नगर– पालिका र बढैयाताल गाउँपालिकामा अभिभावक तथा समुदायको संलग्नता अभिवृद्धि गर्ने उद्देश्य रहेको थियो ।
भदौ ३ र ४ गते सञ्चालन भएको कार्यक्रममा तीन पालिकाका १५ विद्यालयबाट आएका शिक्षक/ शिक्षिका तथा पालिका शिक्षा शाखाका अधिकारीसहित २१ जना सहभागी भएका थिए । बाँके युनेस्को क्लबका अध्यक्ष प्रवेज अलि सिद्धिकीले मधेसी र मुस्लिम समुदायका अभिभावकले आफ्ना नानीबाबूलाई विद्यालय पठाए पनि जिम्मेवारीपूर्ण भूमिका निर्वाह गर्न नसकेको कारण अभिभावक शिक्षाको आवश्यकता देखिएको बताए । “नानीबाबूलाई विद्यालय पठाए पछि जिम्मेवारी सुरु हुने भएकोले अभिभावकले यो जिम्मेवारी वहन गर्नुपर्छ ।” अध्यक्ष सिद्धिकीले भने ।
गुलरिया नगरपालिका नगर उप–प्रमुख सावित्रा गौतमले सामुदायिक विद्यालयमा अध्यापन गर्ने शिक्षक आयोग उत्तीर्ण गरेर आएका भएकाले त्यहाँ गुणस्तरीय शिक्षा हुने विश्वास व्यक्त गरिन् । तर अभिभावकको सक्रिय सहभागिता अभावकै कारण विद्यार्थीले अपेक्षाकृत राम्रो नतिजा दिन नसकेको उनले भनिन् ।
यस्ता किसिमका कार्यक्रमले बालबालिकाको मनोविज्ञान, भावनात्मक विकास, प्रेरणा, विद्यालय र समुदायबीचको सम्बन्ध विस्तार, गुणस्तरीय शिक्षा सुनिश्चितता, स्रोतको प्रभावकारी उपयोग तथा शिक्षकहरूको उत्तरदायित्वमा सकारात्मक प्रभाव पार्ने विश्वास सहभागी शिक्षक लक्ष्मण चौधरीले व्यक्त गरे ।
यस अवसरमा परियोजना संयोजक एवम् बाँके यूनेस्को क्लबको उप–निर्देशक गोविन्द प्रसाद लामिछानेले “एक घर, एक अध्ययन कुनाको” अवधारणा लागू गर्नुपर्ने कुरामा जोड दिँदै विद्यालयमा अभिभावकहरू को सहभागिता बढाउनुपर्ने र बाल बालिकाको सिकाइ उपलब्धि उन्नत बनाउन सहकार्य आवश्यक रहेको बताए ।
कार्यक्रममा बाँके युनेस्को क्लबका कार्यकारी निर्देशक रवि कुमार तुलाधार, प्राविधिक सल्लाहकार सजिद अलि सिद्धिकी, सहजीकरणकर्ता रवी किरण श्रेष्ठ, कार्यक्रम अधिकृत विजय शर्मा, फील्ड सुपरभाइजर भगवती बी.के. र नगमा मनिहर लगाउतको उपस्थित रहेका थिए ।
