धर्म, संस्कृति र परम्पराको संरक्षणसँगै सामाजिक विकृति–विसंगति न्यूनीकरण गर्ने उद्देश्यले बढैयाताल गाउँपालिकाले सन्देश मूलक तीज गीत प्रतियोगिता सम्पन्न गरेको छ ।
गाउँपालिका–६ मैनापोखरमा आयोजित कार्यक्रममा महिला हिंसा, बालविवाह, लागुऔषध सेवन तथा ओसारपसार, सामाजिक सञ्जालको दुरुपयोगजस्ता समस्या बारे सचेतना जगाउने गीत तथा नृत्य प्रस्तुत गरिएको थियो । कार्यक्रममा गाउँपालिका भित्रका ६ वटा महिला समूहले सहभागिता जनाएका थिए । साथै सचेतनामूलक एकल गीत तथा नृत्य पनि प्रस्तुत गरिएको थियो ।
गाउँपालिका उपाध्यक्ष लक्ष्मी कुमारी अधिकारीको सभापतित्वमा सम्पन्न कार्यक्रममा लुम्बिनी प्रदेश सभा सदस्य भुवनेश्वर चौधरी प्रमुख अतिथि रहेका थिए । सोही अवसरमा गाउँपालिका अध्यक्ष हिमालय त्रिपाठी, प्रमुख प्रशासकीय अधिकृत अर्जुन थारु, वडा अध्यक्षहरू, कार्यपालिका सदस्यहरू, संघ–संस्थाका प्रतिनिधि तथा स्थानीय महिलाहरूको उल्लेखनीय सहभागिता थियो ।
प्रतियोगितामा मेलमिलाप महिला समूह (वडा नं. ३) प्रथम, पतञ्जली योग समूह (वडा नं. ६) द्वितीय, जमुनी समूह (वडा नं. २) तृतीय, उपकार आमा समूह (वडा नं. ३) चौथो र दिदीबहिनी समूह (वडा नं. ६) पाँचौं भएका छन्। एकलतर्फ कुश्मी थापा प्रथम, स्वस्तिका खड्का द्वितीय र राफिका थारु तृतीय भएका छन् ।
उत्कृष्ट समूह र कलाकारलाई नगद पुरस्कार तथा प्रमाणपत्र प्रदान गरी सम्मान गरिएको गाउँपालिकाले जनाएको छ ।
