बर्दियाको विभिन्न स्थानमा प्रहरीले ब्राउन सुगरसहित तीन घटनामा चार जनालाई नियन्त्रणमा लिएको छ ।
नियन्त्रणमा लिईएका गुलरिया नगरपालिका वडा नम्बर ४ का तिन जना रहेको र मधुवन नगरपलिकाका एक जना रहेको प्रहरीले जनाएको छ ।
पहिलो घटनामा, साउन २७ गते(मंगलबार) बेलुकी करिब ६ बजे इलाका प्रहरी कार्यालय मैनापोखर बाट खटिएको टोलीले गुलरिया नगरपालिका वडा नम्बर ४ का २९ वर्षीय धर्म बहादुर परियार र २८ वर्षीय जीवन सुनारलाई शंका लागि चेकजाँच गर्दा ३ पुडिया प्लास्टिकमा राखिएको १ दशमलब १० ग्राम ब्राउन सुगर सहित नियन्त्रणमा लिइएको जिल्ला प्रहरी कार्यालय बर्दियाका प्रहरी नायब उपरीक्षक चक्र बहादुर डमरपालले जानकारी दिए ।
त्यसैगरी, बेलुकी ६ः३० बजे जिल्ला प्रहरी कार्यालय बर्दियाबाट खटिएको टोलीले गुलरिया नगरपालिका–११ लालपुरस्थित हुलाकी सडकखण्डमा साइकिलमा यात्रा गरिरहेका गुलरिया नगरपालिका–४ तुलापुरका २४ वर्षीय सन्तोष गोडिया लाई पक्राउ गरेको डमरपालले बताए । उनको साथबाट १ दशमलब ४१० ग्राम ब्राउन सुगर बरामद गरिएको छ ।
तेस्रो घटनामा, बेलुकी ८ः३० बजे प्रहरी चौकी कालिकाबाट खटिएको टोलीले बढैयाताल गाउँपालिका–७ कण्ठपुरमा भारततर्फबाट नेपाल प्रवेश गर्दै गरेका मधुवन नगरपालिका– ३ का २३ वर्षीय राजकुमार परियारलाई र १ दशमलब ५१० ग्राम ब्राउन सुगर सहित नियन्त्रणमा लिएको प्रहरी नायब उपरीक्षक डमरपालले जानकारी दिए ।
तीनै घटनामा पक्राउ परेका व्यक्तिलाई जिल्ला अदालत बर्दिया बाट ५ दिनको म्याद दिई अनुसन्धान भइरहेको डमरपालले जानकारी दिए ।
