२६औँ अन्तर्राष्ट्रिय युवा दिवसको अवसरमा बढैयाताल गाउँपालिकामा युवा र स्थानिय सरकारबीच अन्तरक्रिया कार्यक्रम आयोजित गरिएको छ ।
“दिगो भविष्यको आधार“ भन्ने नारासहित बढैयाताल गाउँपालिको युवा, शिक्षा तथा खेलकुद शाखाको आयोजनामा र बाँके युनेस्को क्लब, आवाज संस्था र कमैया महिला जागरण समाजको सहकार्य तथा गोचाली युवा क्लबको समन्वयमा भएको कार्यक्रममा युवाहरूले रोजगारी, शिक्षा, स्वास्थ्य, बजेट विनियोजन, बाल विवाह, लागुऔषध नियन्त्रण लगायत विविध विषयमा प्रश्न, सल्लाह सुझाव र धारणा राखेका थिए ।
कार्यक्रममा युवाहरू निश्चल परियार, सिद्धार्थ पौडेल, स्वस्तिका खड्का, सरिना चौधरीलगायतले सोधेका प्रश्नको जवाफ वडा अध्यक्षहरू विरबहादुर थारू, राधेश्याम थारू, तेजनाथ पौडेल लगायत गाउँपालिकाकि उपाध्यक्ष लक्ष्मी कुमारी अधिकारी, शिक्षा शाखा प्रमुख विश्वराज ढकाल तथा प्रमुख प्रशासकीय अधिकृत अर्जुन थारूले दिएका थिए ।
कार्यक्रममा युवामैत्री बजेट, सीपमूलक तालिम, शैक्षिक सुधार, बालविवाह न्यूनीकरण, लागुऔषध नियन्त्रण लगायत विषयमा नीति कार्यक्रम लागू भइरहेको जानकारी दिइयो । बाँके युनेस्को क्लबका उप– निर्देशक गोविन्द लामिछानेले गाउँपालिकासंगको समन्वय एवम् सहकार्यमा सञ्चालन भएका कार्यक्रमबारे जानकारी गराए ।
सहभागी संघ संस्था तथा युवाहरु लाई प्रशंसा पत्र ले सम्मान गरिएको थियो ।
