ठाकुरबाबा नगरपालिकाले ४० माइक्रोन भन्दा कम मोटाइको प्लास्टिक जन्य सामाग्री प्रयोग नगर्न अनुरोध गरेको छ । साउन २६ गते प्रेस विज्ञप्ति जारी गर्दै नगरपालिकाले ४० माइक्रोन भन्दा कम मोटाइका प्लास्टिक जन्य सामाग्री प्रयोगले मानव स्वास्थ्य र वातावरणका लागि हानिकारक भएकाले यस्ता किसिमका सामाग्री उत्पादन, आयात, बिक्री वितरण र प्रयोग पूर्णरूपमा निषेध गरिएको सुचना मार्फत ठाकुरबाबा नगरपालिकाले जानकारी गराएको छ ।
प्लास्टिकको प्रयोगले वातावरणीय प्रदूषण मात्र होइन, मानिसको स्वास्थ्यमा पनि गम्भीर असर पार्दै आएको र प्लास्टिकले माटो, पानी र हावामा प्रदूषण बढाउने, जैविक विघटनमा अवरोध र्पुयाउने तथा जनावर, चराचुरुङ्गी र जलचरहरूको जीवनमा खतरा उत्पन्न गर्ने तथ्यलाई उद्धृत गर्दै सक्दो प्लास्टिक जन्य सामाग्री समेत प्रयोग नगर्न नगरपालिकाले अनुरोध गरेको छ ।
२०७८ भाद्र १ गते देखि नै नेपाल सरकारको निर्णय अनुसार ४० माइक्रोन भन्दा कम मोटाइको प्लास्टिकको प्रयोगमा प्रतिबन्ध लगाइए पनि यसको कार्यान्वयन प्रभावकारी नभएकाले पुनः कडाइका साथ लागू गर्ने तयारी रहेको ठाकुरबाबा नगरपालिकाका नगरप्रमुख तिलक लम्सालले जानकारी दिए । ठाकुरबाबा नगरपालिकाले प्लास्टिकका पोलिथिन, कप, फूल, सजावटी सामग्री, फाइल कभर, स्ट्रिप तथा मिठाई प्याकेज जस्ता वस्तुहरू नगर क्षेत्रमा प्रयोग गर्न, उत्पादन गर्न र बिक्रिवितरण गर्न समेत नपाउने नगरप्रमुख लम्सालले बताए ।
ठाकुरबाबा नगरपालिकाको उद्देश्य पालिकाको सहजिकरणमा उत्पादन गरिएका दुना टपरी तथा प्लास्टिकको विकल्पका रूपमा कपडा वा अन्य वातावरणमैत्री सामग्रीको प्रयोग गर्न समेत नगरप्रमुख लम्सालले अनुरोध गरे ।
