ठाकुरबाबा नगरपालिका वडा नम्बर १ भुरीगाउँमा रहेको कर्णाली इङ्गलिस बोडिङ्ग स्कुलमा मतदान प्रक्रियाबाट विद्यार्थी हरूले क्याप्टेन र सहायक क्याप्टेन चयन गर्न निर्वाचन गरिएको छ । क्याप्टेन चयनमा सहमति हुन नसकेपछि निर्वाचन प्रक्रियाबाट चयन गरिएको हो ।
विद्यालयमा विद्यार्थीहरूको नेतृत्वका लागि दाबी गरेका प्रतिस्पर्धीहरू बिच सहमति नभए पछि मतदान प्रक्रिया मार्फत चयन गरिएको निर्वाचन सहायक अधिकृत तथा सहायक प्रिन्सीपल नारायण अधिकारीले जानकारी दिए ।
विद्यालयमा भएको मतदानबाट क्याप्टेनमा पेन्सील कटर चुनाव चिन्हका साथ कक्षा ९ का समिर बुढाले २ सय ५ मतसहित क्याप्टेन र सहायक क्याप्टेनमा घडी चुनाव चिन्हसहित कक्षा १० की मेनुका खड्का २ सय २४ मत प्राप्त गरेर विजयी भएको मुख्य निर्वाचन अधिकृत एवम् विद्यालयका प्रिन्सीपल सुर्दशन पन्थीले जानकारी दिए ।
यस्तै निर्वाचन सहायक अधिकृत नारायण अधिकारीका अनुसार क्याप्टेनमा चकडस्टर चुनाव चिन्हमा कक्षा ९ का एन्जल थापाले ७१ र सहायक क्याप्टेनमा पेन्सिल चुनाव चिन्हका कक्षा ९ कै समिर पाण्डेले ७२ मत प्राप्त गरेका थियो । क्याप्टेन र सह क्याप्टेन तर्फ ४ सय २४ मत मध्ये ४ सय १५ मत सदर भएको थियो भने ९ मत बदर भएको थियो ।
मतदानमा विद्यालयका कक्षा ४ देखि १० सम्मका ४ सय ५० जना विद्यार्थीहरूमध्ये ४ सय २४ जनाले भाग लिएका थिए । विद्यालयले संसदीय चुनावको अभ्याससहित एक साताको निर्वाचन प्रक्रिया हुँदै मतदान बाट विद्यार्थीहरूबाट क्याप्टेन र सहायक क्याप्टेन चयन गरेको जनाएको छ ।
मतदानमार्फत क्याप्टेन र सहायक क्याप्टेन चुन्ने प्रक्रियामा विद्यार्थीहरूलाई नमुना मतपत्र बनाएर मतदान गर्ने तरिका सिकाइएको थियो । विद्यालयका कक्षा ४ देखि १० सम्मका सबै विद्यार्थीहरूलाई मतदान गर्न पाउने व्यवस्था सहित मतदाता नामा वली प्रकाशन, प्रतिस्पर्धीहरूलाई चुनाव चिन्ह प्रदान गरेर आफ्नो प्रतिबद्धता राखेर मत माग्ने समय समेत दिइएको थियो ।
