गुलरिया / बर्दिया जिल्ला अदालतले आफ्नो वार्षिक कार्ययोजना अनुसार राखेको मुद्दा फर्छ्यौटको लक्ष्य भन्दा बढी मुद्दा फर्छ्यौट गरेको छ ।
आर्थिक वर्ष ०८१/०८२ को अन्तिम महिना नसकिदै लक्ष्य भन्दा बढी मुद्दा फर्छ्यौट गरेको अदालतकी सूचना अधिकारी एवं शाखा अधिकृत अमृता के.सी.ले जानकारी दिइन । यस आर्थिक वर्षमा मुद्दाको फर्छ्यौट लक्ष्य १५ सय ३६ राखिएकोमा असारको १७ गते सम्म लक्ष्य भन्दा बढि १६ सय ४३ मुद्दा फर्छ्यौट भएको केसीले बताइन । बर्दिया जिल्ला अदालतले लक्ष्य भन्दा बढी १ सय ७ प्रतिशत मुद्दा फर्छ्यौट भएको केसीले भनिन् । जिल्ला अदालतले अनुमानित कुल लगतको ७० दशमलव ०४ प्रतिशत मुद्दा फर्छ्यौट गर्ने लक्ष्य राखिएकोमा अदालतले लक्ष्य भन्दा बढी मुद्दा फर्छ्यौट गरेको समेत केसीले जानकारी दिनुभयो ।
गत आर्थिक वर्षमा जिम्मेवारी सरी आएका ८ सय ३ र यस आर्थिक वर्षको असार १७ गते सम्म नयाँ दर्ता भएका १४ सय ९ मुद्दा गरी जम्मा २२ सय १२ मुद्दाको लगत रहेकोमा १६ सय ४३ मुद्दा फर्छ्यौट भई हाल ५ सय ६९ मुद्दा विचाराधिन अवस्थामा रहेको केसीले भनिन् । बर्दिया जिल्ला अदालतको गत आर्थिक वर्षमा जम्मा लगतको ६२ प्रतिशत मात्र मुद्दा फर्छ्यौट गरेको थियो ।
