राजापुर नगरपालिका वडा नं. ८ मा आर्थिक वर्ष २०८१/८२ को स्वीकृत वार्षिक कार्यक्रम अन्तर्गत “पढ्दै कमाउँदै” कार्यक्रम संचालन गरिएको छ।
कार्यक्रम अन्तर्गत राजापुर नगरपालिका बाड नं ८ स्थित भेरी माध्यमिक विद्यालयका कक्षा १० का २७ जना विद्यार्थीहरूलाई २ सय २ वटा हाँसका चल्ला वितरण गरिएको राजापुर नगरपालिका बाड नं ८ का वडा अध्यक्ष राजेश थारूले बताए । वितरण कार्यक्रममा विद्यार्थीहरूले खाली समयको सदुपयोग गर्दै आयआर्जन तर्फ पनि अवसर पाएको बिद्यार्थीहरुले बताएका छन्।
वडा अध्यक्ष थारूले भने “यो कार्यक्रम सिकाइसँगै आम्दानी जोड्ने प्रयास हो, जसले विद्यार्थीहरूलाई आत्मनिर्भर बनाउने विश्वास लिएको छ” उनले भने । भविष्यमा यस कार्यक्रमलाई अझ प्रभावकारी बनाउँदै उपयुक्त बजेट विनियोजन गरी व्यवस्थित रूपमा अघि बढाइने योजना रहेको समेत थारुले जानकारी दिए । चल्ला पाएका बिद्यार्थीहरू भन्छन्, “खाली समयमा कमसेकम काम त पायौँ, धेरै खुसी लाग्यो” उनीहरुले भने ।
पछिल्लो समय मोबाइल तथा डिजिटल माध्यमको बढ्दो प्रयोगले बालबालिकाको शारीरिक तथा मानसिक स्वास्थ्यमा असर पारिरहेको अवस्थामा यस्तो कार्यक्रम प्रभावकारी भएको अभिभावकहरू बताउँछन्।
शिक्षकहरूले पनि सानो बजेटबाट सुरु गरिएको यो कार्यक्रम प्रशंसनीय भएको जनाएका छन्। साथै, वडाले आगामी दिनमा गरिब तथा जेहेन्दार विद्यार्थीहरूलाई लक्षित गरेर थप कार्यक्रम ल्याउने समेत स्थानीयले अपेक्षा व्यक्त गरेका छन्। चल्ला पाएका विद्यार्थीहरू निकै खुसी देखिएका थिए।
