गुलरिया, कात्तिक २५ गते (माउण्टेनसमाचार) / शहीद यमलाल लामिछाने स्मृति प्रतिष्ठान द्वारा कार्तिक १७ गते देखि आयोजित रात्रिकालिन क्रिकेट प्रतियोगिताको फाइनल खेल पप्पु लेजेन्ट र एफ.एस.यु. बिच हुने भएको छ।
कार्तिक २४ गते गुलरियाको कबर्डहलमा भएको सेमिफाइनल खेलमा पप्पु लेजेन्ट ले ब्वाइज अफ टिकापुर लाई ६ विकेटले पराजित गर्दै प्रतियोगिताको फाइनलमा प्रवेश गरेको छ। पहिलो ब्याटिङ गरेको ब्वाइज अफ टिकापुर ले ८.३ बलमा सबै विकेट गुमाएर ३८ रनमा अलआउट भएको थियो । पप्पु लेजेन्टका तर्फबाट बलिङ गर्दै आलोक चौधरीले १ रन दिएर ४ विकेट लिएका थिए भने टिकापुरको तर्फबाट ब्याटिङमा प्रशान्त बिकले मात्र दोहोरो अंक ११ रन जोड्न सफल भएका थिए।
३९ रनको लक्ष्य लिएर आएको पप्पु लेजेन्टले रन ५.३ ओभरमा ४ विकेटको क्षति मा ४३ रन बनाएर पप्पु लेजेन्ट विजयी भएको थियो । पप्पु लेजेन्टको तर्फबाट ब्याटिङ गर्दै मनोज यादवले १३ बलमा २७ बनाएका थिए। १ रन दिएर ४ विकेट लिएका आलोक चौधरी म्यान अफ द म्याच घोषित भएका थिए।
यस्तै अर्को सेमिफाइनल खेलमा एफ.एस.यु. ले बर्दिया क्रिकेट एकेडमीलाई २ रनले पराजित गर्दै एफ.एस.यु. फाइनलमा प्रवेश गरेको छ। एफ.एस.यु.ले पहिलो ब्याटिङ गर्दै १२ ओभरमा ६६ रन मै अलआउट भएको थियो। एफ.एस.यु.का लागि ब्याटिङ गर्दै छविलाल ले २० रन, सुदिप सिंहले १५ रन र निश्चल चन्दले १५ रन बनाएका थिए भने एकेडमीको तर्फबाट सम्यक थापाले ३ विकेट लिएका थिए साथ रजनिश यादव र राजु पासीले समान २ विकेट लिएका थिए। ६७ रन को लक्ष्य लिएर आएको बर्दिया क्रिकेट एकेडमी ११.३ ओभरमा ६४ रन मै अलआउट भएको थियो । एकेडमीका तर्फबाट ब्याटिङ गर्दै सुलभ चौधरीले १९ रन, निर्मल गुरुङ १४ रन र अर्पण पौडेलले १० रन बनाएका थिए। बलिङ तर्फ म्यान अफ द म्याच समेत भएका एफ.एस.यु.का सुदिप लामिछानेले ३ विकेट लिएका थिए।
प्रतियोगितामा २२ वटा टिमको सहभागीता रहेको र प्रतियोगितामा प्रथम हुनेले ५० हजार रुपैया र दोस्रो हुने टिमले ३० हजार नगद रूपैयाँ पुरस्कार प्राप्त गर्ने प्रतियोगिता संचालन समितिका संयोजक लक्ष्मण भण्डारीले जानकारी दिए।
