काठमाडौँ, कात्तिक २० गते / भारतले नेपालका भूकम्पपीडितलाई १६ करोड रुपैयाँ बराबरको राहत सामग्री सहयोग गरेको छ । भूकम्पमा नेपाललाई हरसम्भव सहयोग उपलब्ध गराउने प्रधानमन्त्री नरेन्द्र मोदीको प्रतिबद्धताअनुरूप आपत्कालीन राहत सामग्रीको पहिलो खेप नेपालगन्ज ल्याइएको काठमाडौंस्थित भारतीय दूतावासले जनाएको छ ।
भारतीय वायुसेनाको सी–१३० नामक विशेष विमान ११ टनभन्दा बढी आपत्कालीन राहत सामग्री लिएर आएको हो । उक्त सामग्री भारतीय राजदूत नवीन श्रीवास्तवले उपप्रधान तथा रक्षामन्त्री पूर्णबहादुर खड्कालाई हस्तान्तरण गरे । आपत्कालीन राहत सामग्रीमा भूकम्प प्रभावितका लागि त्रिपाल, टारपोलिन सिट, कम्बल, स्लिपिङ ब्याग, पोर्टेबल भेन्टिलेटरलगायत चिकित्सा उपकरण र अत्यावश्यक औषधि रहेको दूतावासले जनाएको छ ।
अमेरिकाको स्पेसल अपरेसन कमान्ड प्यासिफिकले पनि भूकम्पपछि जाजरकोटका बासिन्दालाई सहयोग पुर्याएको छ । काठमाडौंस्थित अमेरिकी दूतावासका अनुसार अमेरिकाले विपद् राहत प्रणालीअन्तर्गत सशस्त्र प्रहरी बलमार्फत सहयोग गरेको जनाएको हो । अमेरिकाले त्रिपाल, खाने सामग्री, खाट, कम्बललगायत सामग्री सहयोग गरेको हो ।
चिनियाँ राष्ट्रपति सी चिनफिङले भूकम्पबाट भएको ठूलो धनजनको क्षतिको खबरले आफू स्तब्ध भएको बताएका छन् । समकक्षी नेपालका राष्ट्रपति रामचन्द्र पौडेललाई आइतबार शोकसन्देश पठाउँदै राष्ट्रपति चिनफिङले चीन सरकार र चिनियाँ जनताका तर्फबाट मृतकप्रति श्रद्धाञ्जली व्यक्त गरेको नेपालका लागि चिनियाँ राजदूत छन सोङले सामाजिक सञ्जाल एक
(ट्वीटर) मार्फत जानकारी दिएका छन् । चीनले भूकम्पपीडितलाई १२ करोड रुपैयाँ बराबरका सामग्री दिने भएको छ । उक्त सामग्री केही दिनभित्र नेपाल आउने बताइएको छ । विश्व खाद्य कार्यक्रमले पनि भूकम्पपीडितलाई ५ सय टन खाना सहयोग गरेको छ । साभार कान्तिपुर
