मेरो देश
युग युगदेखि
सर्वथा स्वतन्त्र छन्
जसका
सुन्दर,शान्त र श्वेत हिमाल
हरित पर्वतमाला
स्वतन्त्र छन्
छन् स्वतन्त्र स्वर्णिम
मधेसका फाटहरु
स्वतन्त्रताको गौरवले
ओतप्रोत
अखण्ड ,विशाल
मेरो देश,मेरो नेपाल !
जन्मदै स्वतन्त्रताको कर्णपृय
सङ्गीत सुसेलेर
जहाँ बग्छन कन्चन
कर्णाली ,गण्डकी र
कोसीहरु
जहाँ स्वतन्त्र
सभ्यताकोअनमोल
उषा छ
पथ पथमा जहाँ
पार्वतीको पदचाप छ
जनमनमा जहाँ
सत्चरित्र सीताको छाप छ
जहाँ कहिल्यै नझुक्ने
चन्द्र ,सूर्य अङ्कित
रातो झन्डाको सान छ
जहाँ वीरताको गाथा
वलिदानको कथा
र रगतले लेखिएको
स्वतन्त्रताको निशान छ!
जहाँ हरदम स्वतन्त्र छ
हिमाल,पहाड र मधेस
अखण्ड ,अकण्टक नेपाल
मेरो प्राण मेरो देश !
चौतर्फी गुलामी तर
बीचमा स्वतन्त्रताको
स्वाभिमान
जहाँ छ गुरु गोरखनाथको
उपदेश
बिसे नगर्चीको अर्ती
पृथ्वीनारायणको नेतृत्व
कालू पाण्डे ,विराज बखेती
अमर ,भक्ति ,बलभद्र,
भीमसेनहरुको
पौरखले
हिमालदेखि सागरसम्म
टिष्ठादेखि काङ्गडासम्म
आर्जेको धर्ती
आत्मसम्मानका खातिर
जहाँ खडा छन्
महाकाली र महादेवका
खुडा,तरवार र भालाहरु
शान्ति र मानवताका
खातिर
जहाँ हरदम गुन्जिन्छन
बुद्धका वाणी
र झुल्छन रुद्राक्षका
मालाहरु
यो युद्ध र बुद्ध
जन्माउन सक्ने
क्रान्ति र शान्तिको देश
गुलामहरुको बीचमा
अविचलित
स्वतन्त्रताको पताका
फहराउने देश
अखण्ड ,विशाल
मेरो नेपाल
मेरो देश।
