धनगढी । सुदूरपश्चिम प्रदेशका उद्योग, पर्यटन, वन तथा वातावरण मन्त्री रामेश्वर चौधरी बर्खास्तीमा परेका छन् । मुख्यमन्त्री कमलबहादुर शाहले आफ्नो निर्देशन अवज्ञा गरेको भन्दै चौधरीलाई बिहीबार बर्खास्त गरेका हुन् ।
मुख्यमन्त्री शाहले चौधरीलाई असार ३ गते राजीनामा दिन निर्देशन दिएका भए पनि चौधरीले सार्वजनिक रूपमा ‘सक्ने भए बर्खास्त गर्न’ भन्दै चुनौती दिएका थिए ।
बजेट निर्माणको क्रममा मन्त्री चौधरीले वित्तीय अनुशासनको पालना नगरेको, खप्तड क्षेत्र पर्यटन विकास तथा व्यवस्थापन समितिमा कार्यकारी निर्देशक नियुक्त गर्दा कुनै जानकारी नदिएको लगायतका कार्य गरेपछि मुख्यमन्त्रीले शाहले राजीनामा मागेका थिए ।
गत जेठ ४ गतेमात्रै मन्त्री नियुक्त भएका नागरिक उन्मुक्ति पार्टीका सांसद चौधरी बर्खास्तीमा परेपछि गठबन्धनमा खटपट हुने देखिएको छ ।
सुदूरपश्चिममा नेपाली कांग्रेसको नेतृत्वमा एमाले र नागरिक उन्मुक्तिको संयुक्त सरकार छ ।
