काठमाडौँ । पत्रकार दिलभूषण पाठकलाई नपक्रन उच्च अदालत पाटनले आदेश दिएको छ । न्यायाधीश ऋषि भण्डारीको एकल इजलासले सोमबार पाठकको निषेधाज्ञा निवेदनमाथि सुनुवाइ गर्दै अल्पकालीन अन्तरिम आदेश जारी गरेको हो ।
पाठकको निषेधाज्ञा निवेदनमाथि अल्पकालीन अन्तरिम आदेश जारी भएको हो । अदालतले दुवै पक्षलाई असार ५ गते छलफलका लागि बोलाएको छ ।
प्रहरीको साइबर ब्युरोले विद्युतीय कारोबार (साइबर अपराध) मुद्दामा जिल्ला अदालत काठमाडौँबाट पक्राउ पुर्जी लिएपछि पत्रकार पाठकले उच्च अदालत पाटनमा निषेधाज्ञा निवेदन दिएका थिए ।
नेपाली कांग्रेसका सभापति शेरबहादुर देउवाका छोरा जयवीरसिंह देउवाले दिएको उजुरीका आधारमा नेपाल प्रहरीको साइबर ब्युरोले पाठकविरुद्ध मंगलबार पक्राउ पुर्जी जारी गरेको हो ।
जयवीर कांग्रेस सभापति शेरबहादुर देउवा र परराष्ट्रमन्त्री आरजु राणा देउवाका छोरा हुन् । पाठकले आफ्नो युट्युब कार्यक्रम ‘टफ टक’ मार्फत ‘हिल्टनमा जयवीर देउवाको पैसा !’ शीर्षकमा भिडियो सामग्री प्रस्तुत गरेका थिए ।
