बर्दिया, जेठ २९ गते / नेपाल सरकार द्वारा २०८२/८३ को बजेट मार्फत सुन, हिरा तथा बहुमूल्य पत्थरमा १३ प्रतिशत मूल्य अभिवृद्धि कर (VAT) वृद्धि गरेपछि त्यसको व्यापक विरोध हुन थालेको छ। कर वृद्धिका कारण आम उपभोक्ता मारमा परेको सुनचाँदी व्यवसायी संघ वर्दियाका अध्यक्ष विष्णु सुनारले बताएका छन । ” व्यवसायीहरूले व्यापार बन्द गर्ने चेतावनी समेत दिएका छौ , यदी माग सम्बोधन भएन भने अझै कडा भन्दा कडा आन्दोलनमा जान्छौ” सुनारले भने।
बर्दिया सुनचाँदी व्यवसायी संघ बर्दियाले विहिबार एक प्रेस विज्ञप्ति जारी गर्दै सरकारले सुन, हिरा र जवाहारातमा लगाइएको १३ प्रतिशत VAT तथा २% विलासिता कर तत्काल खारेज गर्न माग गरेको छ। महासंघले यो कर वृद्धिले उपभोक्तामाथि अनावश्यक भार थपिएको र सुनचाँदी व्यवसायीहरू घाटामा गएका कारण धैर्यको सीमा नाघेको विज्ञप्तीमा जनाएको छ।
प्रेस विज्ञप्तिमा भनिएको छ, “यदि यस प्रकारको कर प्रणाली कायम रह्यो भने हामी बाध्यतावश व्यवसाय बन्द गर्नुपर्छ। यसले बजारमै अस्थिरता ल्याउनेछ।”
संघको मागहरू:
– सुन तथा गहनामा लगाइएको २ प्रतिशत विलासिता कर खारेज गरियोस्।
– हिरा-जवाहरातमा लगाइएको कर तत्काल पुनर्विचार गरियोस्।
– सुनचाँदी व्यवसायलाई दीर्घकालीन रूपमा प्रोत्साहन गर्न ऐन, नियम र नीतिगत व्यवस्था गरियोस्।
-२.५% टि.डि.यस. समेतको दोहोरो कर प्रणाली खारेज लगायतका ७ बुंदे माग राखिएको विज्ञप्ती जारी गरिएको छ ।
व्यवसायीहरूका अनुसार सरकारले मागअनुसार तत्काल समाधान नगरे जनस्तरको सहयोगमा देशव्यापी आन्दोलन गर्न बाध्य हुने चेतावनी पनि दिएका छन्।