तम्घास, माघ १७ गते / तम्घासमा बाँदर र बदेलले दुःख दिएपछि स्थानीयहरुले रुख कटान गर्न सुरु गरेका छन् ।
जिल्लाको रेसुङ्गा नगरपालिका वडा नम्बर १ का स्थानीयहरुले निजी जग्गामा रहेका कुकाठ, बाँस, सल्ला, खरीलगायत झाडी फडानी गरेको वडा कार्यालयले जनाएको छ । वडा कार्यालयले तम्घासको उदिन ढुङ्गास्थित आर्दश बोडिङ स्कुलदेखि तिनधारा हुँदै वडा नम्बर २ को सिमानासम्मका रुखहरु काटेको हो ।
सुनसन बन्दै गएको गाउँबस्तीमा कुकाठ र झाँडीले ढाकेपछि किसानलाई बाली संरक्षण गर्न सकस भएका कारण रुख कटान गरेको स्थानीयहरुले जनाएका छन् । वडावासीहरुले लगाएको अन्नवाली जङ्गली जनावरले सखाप पारेर हैरान बनाएपछि कुकाठ र झाँडी फडानी गरेको वडा नम्बर १ का वडाअध्यक्ष रामप्रसाद पन्थीले जानकारी दिनुभयो ।
झाडी फडानीले बाँदर नियन्त्रणमा सहज भएको कृषक सुन्तली कामीले बताउनुभयो । पहिले एक्लै हिँडडुल समेत गर्न समस्या हुने गरेको उक्त स्थानमा अहिले झाडी र कुकाठ काट्नाले सहजता र वस्ती नै उज्यालो भएको उहाँको भनाइ छ ।
कुकाठ र झाडीका कारण खेतबारी तथा घर रहेको अन्नबाली खाने र प्रायः दुःख दिने गरेको गरेको कृषकको गुनासो छ । कुनै समय खेती गर्दै आएको जग्गा समेत बाँदरका कारण बाँझो राख्दै आएको स्थानीय उमाकान्त पन्थीले बताउनुभयो ।
गत वर्ष वडा कार्यालयले ४५ दिन बाँदर हेरालु राखेर ३० हजार भुक्तानी गरेको थियो । त्यसबाट प्रतिफल नआएपछि अहिले झाडी फडानी गर्नका लागि ७० हजार रुपियाँ व्यवस्था गरेको वडाअध्यक्ष पन्थीले बताउनुभयो ।
फडानी गरेको खाली जग्गामा कागती, टिमुर, अदुवा, पिडालु, बेसारलगायतका फलफूलका विरुवा रोप्ने वडा कार्यालयले जनाएको छ ।
गोरखापत्र/ तिलाचन पाण्डे
