बर्दिया,कात्तिक २५(माउण्टेनसमाचार) / नेपालीहरुको महान् चाड शुभ दिपावली सुरु भएसंगै बजारमा भिडभाँड बढेको छ । शुक्रबार धनतेरसको दिन देखि गुलरिया बजारमा किनमेल गर्नेको भिडभाँड उल्लेख्य रुपमा बढेको हो ।
घर र पसलमा लगाईएका झिलीमिली बत्तीले बजार नै झकिझकाउ बनेको छ । गुलरियाको भन्सार रोडमा तिहारका लागि आवश्यक पर्ने सामाग्रीहरु किनमेल गर्नेको भिडभाँड लागेको छ ।
लक्ष्मी र गणेशको मूर्ति, तामा, स्टीललगायतका भाँडाहरुको पनि उल्लेख्य मात्रामा बिक्री वितरण भइरहेको छ । गुलरिया बजारमा ठाउँ ठाउँमा आकर्षक मूर्तिलगायत पुजाका सामाग्रीहरु बिक्रीको लागि सजाएर राखिएको स्टल देखिन्छ । तिहारको बेला किनमेल बढ्ने भएकोले व्यवसायीहरुले पसल अगाडि विक्री गर्न सामानहरु राखेका छन् ।
माटाका दियो, झिलीमिली बत्ती, भाइमसला, सप्तरंगी टीकालगायत लक्ष्मी पुजामा आवश्यक सामाग्री किन्नेहरुको चहलपहल बढेको छ ।
तिहारको लागि आवश्यक सामाग्री किन्नेहरुको भिडभाँड बढेको गुलरिया नगरपालिका–६ भन्सार रोड स्थित एस.के.किराना पसलका अफजल खानले बताए । ‘एउटै ठाउँबाट सेवाग्राहीको माग सम्बोधन हुने गरि पसल अघि स्टल लगाएका छौं’खानले भने,‘लक्ष्मी पुजा र भाई टिकालगायतका अन्य आवश्यक सम्पुर्ण सामाग्रीहरु उपलब्ध छ ।’
